Balla: Meta të vendosë, do jetë President apo lider i opozitës?!
Kreu i Grupit Parlamentar të PS- së, Taulant Balla, tha dje se “Hallet e shqiptarëve janë tërësisht të ndryshme nga halli i Ilir Metës”. Në një prononcim për mediat, i pyetur nëse kriza e fundit mes Presidentit dhe shumicës do të ndikojë në raportin e komisionit për hapjen e negociatave me Shqipërinë, Balla ka dhënë këtë përgjigje: “Nuk kemi krizë me Presidentin, ka Presidenti krizë me Ilir Metën dhe këtë duhet ta zgjidhë Presidenti me Ilir Metën, që do të thotë që Meta të ndajë përfundimisht nëse do të jetë një prej liderëve të opozitës apo Presidenti i vendit. Ai është një institucion në hetim parlamentar për shkelje të rënda të Kushtetutës dhe shkeljet e rënda nëse Komisioni Hetimor Parlamentar i gjen bazuar në hetimin që po bën, është Komisioni Hetimor që në vijim të praktikës së bashkëpunimit me Venecian, ka kërkuar edhe ekspertizën e saj, dhe nëse Kuvendi voton me 94 vota shkarkimin, kjo procedurë i kalon Kushtetueses”, tha Balla. Menjëherë reagoi zëdhënësi i Presidenti, Tedi Blushi, i cili tha se “Fakte të reja do dalin dhe ti ke kohë deri më 2 mars të marrësh kthesën e radhës, siç e merr gjithmonë”. Po ligjin antikushtetues Dvorani, pse e miratuat pa pritur Venecian? S’ka nevojë, thotë Tao Tao, sepse pamë disa sugjerime që Venecia u ka dhënë disa vendeve të tjera që kanë Kushtetutë tjetër nga e jona, dhe s’mund të ndalonim ta bënim fakt të kryer ligjin mafioz të rrëmbimit të Gjykatës Kushtetuese. Duan të sabotojnë ndihmat ( borxhet), thotë Tao. Vetëm një PPP e tyre shkon 1 miliardë euro. Edhe 20 miliardë euro borxhe të japë bota, duke rrëmbyer Gjykatën Kushtetuese në mënyrë mafioze nga kjo bandë, asgjë nuk do shkojë në xhepat e shqiptarëve, por në xhepat e tyre dhe të disa kreditorëve. Fakte të reja do dalin Tao, dhe ti ke kohë deri më 2 mars të marrësh kthesën e radhës, siç e merr gjithmonë”, reagoi Blushi.