Kontrolle për virusin, Barça lë jashtë shqiptarin Rei Manaj
Barcelona dhe Lionel Mesi nuk do t'i shpëtojë dot protokollit të vendosur nga Ministria e Shëndetësisë italiane, për shkak të alarmit të përhapur për virusin ( Koronavirus) që ka trembur botën dhe Europën. Të gjithë lojtarët katalanas do t'i nënshtrohen kontrollit në aeroportin e Napolit "Kapodikino", ku do të mbërrijnë ditën e sotme në orën 13: 00 për ndeshjen e vlefshme për fazën e 1/ 8- ave në Ligën e Kampioneve. Futbollistëve katalanas do t'u bëhet një matje e temperaturës dhe nëse ka ndonjë prej tyre me temperaturë të lartë, do të bëhen analizat më të detajuara për të kuptuar shkakun. Ky në fakt është rregulli që ndiqet për të gjithë, edhe pse Barcelona është një skuadër e madhe dhe nuk do t'ia lejojë vetes që futbollistët e saj të zbulohen me Koronavirus në Aeroportin e Napolit. Lajmi i publikuar ditën e djeshme nga mediat italiane dhe ato spanjolle ka bërë xhiron e botës në mediat sportive. Italia po kalon një situatë alarmante, pasi mbi qindra persona kanë rezultuar të prekur me Koronavirus dhe 3 persona kanë humbur jetën. Shumë ndeshje në zonën e Lombardisë u shtynë, ndërsa për Napoli- Barcelona nuk ka asnjë rrezik.
Manaj, jashtë - Kike Setien ka bërë veprimin e çuditshëm këtë herë, duke publikuar listën e lojtarëve të grumbulluar dy ditë përpara ndeshjes. Për fatin e keq të Rei Manajt, Setien nuk ka vendosur që ta marrë me vete në Napoli, edhe pse Breithueit nuk është pjesë e skuadrës së federuar në UEFA. Trajneri i katalanasve ka grumbulluar për këtë sfidë shumë lojtarë nga skuadra B, por jo Manajn. Araujo, Akieme, Kojado, Riki Puxh dhe Ansu Fati janë përfshirë në listën e publikuar nga katalanasit, por jo sulmuesi i Kombëtares shqiptare. Gjatë kësaj kohe, Manaj është stërvitur rregullisht me ekipin e parë, por Setien nuk ka qenë shumë i bindur për ta pasur në stol në një ndeshje të rëndësishme si ajo ndaj Napolit në Ligën e Kampioneve. Manaj u grumbullua për ndeshjen e La Ligës kundër Getafes, por nuk u aktivizua. Kjo do të thotë se në fazën e 1/ 8- ave të Ligës së Kampioneve nuk do të kemi një duel shqiptarësh mes Hysajt dhe Manajt. Ky i fundit do qëndrojë në Barcelonë, duke vazhduar përgatitjet me ekipin B. Interesant është fakti që Setien ka marrë me vete Breithueitin, edhe pse s'mund të luajë.