Koronavirusi, pezullohen fluturimet në veriun e Italisë
Balluku: Ndalohet vetëm transporti i njerëzve, jo i mallrave
Pas shfaqjes së dy rasteve të para të infektuar me koronavirus në Shqipëri, Ministria e Shëndetësisë firmosi disa urdhra, mes të cilëve edhe pezullimin e fluturimeve nga Shqipëria drejt veriut të Italisë dhe anasjelltas. Ndërkohë, në një deklaratë për mediat, ministrja e Transportit dhe Energjetikës, Belinda Balluku, shpjegoi se vendimi është marrë me qëllim minimizimin e përhapjes së virusit COVID- 19. Balluku tha se ndalohen të gjitha fluturimet për pasagjerët, por jo për avionët kargo, që kryejnë transportin e mallrave. Ministrja theksoi se ndalohet edhe transporti i pasagjerëve përmes linjave detare Durrës- Ankona- Trieste, por jo i anijeve të mallrave. “Sot kemi vendosur që të ndërpresim të gjitha akseset e transportit ajror dhe detar në zonat e kuqe dhe zonat përreth në Itali. E dimë që është një vendim drastik, por është marrë në një situatë të jashtëzakonshme. Ju bëj thirrje që duhet ruajtur qetësia, nuk ka arsye për panik. Duhet bashkëpunim nga ana e qytetarëve”, tha Balluku. Ndërkohë, ministrja sqaroi se bllokimi është bërë vetëm për transportin e njerëzve dhe jo të mallrave. “Janë pasagjerët ata që nuk do të lejohen të fluturojnë drejt veriut të Italisë. Si në rrugë detare, ashtu edhe në atë ajrore, i referohemi ndalimit vetëm të transportit të njerëzve dhe jo të mallrave”, tha Balluku. Ajo apeloi kompanitë ajrore të gjejnë mënyra për lehtësimin e lëvizjes së pasagjerëve. “Do të ishte shumë mirë që kompanitë të ndjekin një rrugë që do të ndihmonte qytetarët, duke i dërguar ata në një destinacion tjetër brenda Italisë, si aeroporti i Romës apo Barit që janë të aksesueshëm aktualisht, që do t’u jepte mundësinë atyre për të arritur në destinacionin përfundimtar”, tha Balluku.