Nga mbyllja e shkollave te ndërprerja e operacioneve, masat kundër koronavirusit
“Deri më 23 mars mbyllen shkollat, kopshtet dhe çerdhet, deri më 3 prill anulohen aktivitetet sportive, kulturore dhe tubimet”
Deri dje, qytetet e zbrazura nga njerëzit dhe masat ekstreme kundër koronavirusit i kishim parë që vinin nga Kina apo edhe nga Italia së fundmi.
Por pas dy rasteve të para të konfirmuara në vendin tonë mesnatën e së dielës, duhet të fillojmë të përgatitemi që situata të ngjashme t'i përjetojmë edhe në qytetet tona. Qeveria u mblodh dje në një mbledhje të jashtëzakonshme në orën 09: 00, nga ky Kryeministri Rama, por edhe ministrja e Shëndetësisë, Manastirliu, bënë apel për trajtim me kujdes dhe vëmendje maksimale ndaj kësaj situate të krijuar. Nga kjo mbledhje e jashtëzakonshme, qeveria mori dy vendime, për të ngritur karantinën për të gjithë të prekurit dhe të dyshuarit në Konvaleshencën e Ministrisë së Brendshme në plazhin e Durrësit, si strukturë për shërbimin e karantinës, si dhe një shtesë prej 400 milionë lekësh në buxhetin e Ministrisë së Shëndetësisë, që do të përballohet nga fondi rezervë i shtetit. Pak pas mbledhjes së qeverisë, ministrja e Shëndetësisë, Ogerta Manastirliu, në konferencën për shtyp me mediat, njoftoi masat e marra pas konfirmimit të rasteve të para me koronavirusin e ri COVID- 19 në vendin tonë. Ministrja e Shëndetësisë theksoi në fjalën e saj se për dy javët e ardhshme do të jenë të mbyllura të gjithë institucionet arsimore, që nga çerdhet deri tek universitetet publike dhe private. "Kemi vendosur mbylljen e institucioneve arsimore duke filluar nga kopshtet, por edhe të çerdheve publike dhe jopublike për një periudhë dyjavore. Kemi vendosur anulimin e aktiviteteve publike dhe jopublike të tilla si aktivitete sportive, aktivitete kulturore, konferenca, deri në datën 3 prill. Anulimin e grumbullimeve masive në vende të mbyllura apo të hapura të tilla si koncerte, tubime dhe dëgjesa publike, deri në datën 3 prill", bëri të ditur Manastirliu. Ajo theksoi edhe vendimin që të gjithë shtetasit që do të hyjnë në territorin e Shqipërisë dhe vijnë nga zona e izoluar në Itali, të vetëkarantinohen për një periudhë 14- ditore në ambientet e banesave të tyre si një masë parandaluese për mospërhapjen e infeksionit të shkaktuar nga COVID- 19. Më tej, ministrja tha se që prej ditës së djeshme ka hyrë në fuqi urdhri për kufizimin e disa ndërhyrjeve kirurgjikale, duke bërë vetëm disa përjashtime specifike. Ajo theksoi në fjalën e saj se ndërhyrjet kirurgjikale nuk do të ndërpriten në shërbimin e urgjencës dhe se pezullimi i tyre nuk duhet bërë shkak për rrezikimin e jetës së qytetarëve. "Kemi nxjerrë sot një urdhër të ri që ka të bëjë me kufizimin dhe ndalimin e ndërhyrjeve operatore kirurgjikale të planifikuara, duke përjashtuar këtu të gjitha ato ndërhyrje operatore, të cilat kanë lidhje me patologjitë malinje. Nuk do të ketë asnjë ndalim për sa u përket shërbimeve kirurgjikale të urgjencave. Nuk do të cenojmë shërbimin e kujdesit shëndetësor ndaj qytetarëve", tha Ogerta Manastirliu. Gjithashtu, në një urdhër tjetër u bë i ditur ndalimi i përkohshëm i shoqëruesve dhe familjarëve të pacientëve në ambientet e institucioneve të kujdesit shëndetësor. Pranë pacientëve në sallat e spitaleve do të jenë pranë vetëm pjesëtarë të personelit mjekësor. "Në ambientet e shërbimeve të urgjencës mjekësore, në institucionet e kujdesit shëndetësor, do të ndalohet përkohësisht hyrja e shoqëruesve dhe familjarëve të pacientëve më përjashtim të rasteve kur një kërkesë vjen nga drejtoria spitalore apo shefi i shërbimit të spitalit. E njëjta gjë do të ndodhë jo vetëm në shërbimin e urgjencës, por edhe në spitalet e tjera që janë pjesë e korpusit të spitaleve, siç është rasti i Spitalit Infektiv në QSUT. Por kjo do të jetë një normë për të gjitha spitalet", tha Manastirliu. Më vonë, në konferencë doli edhe ministrja e Arsimit, Besa Shahini, e cila theksoi se do punohet për ngritjen e klasave virtuale përmes aplikacioneve në internet, në mënyrë që nxënësit të mos humbasin shumë orë mësimi. Me gjithë këtë plan masash, Shqipëria futet zyrtarisht në hartën e vendeve që janë vënë në "lupën" e koronavirusit COVID- 19. Këto masa të forta që në ditën e parë të ndërmarra nga instancat shtetërore tentojnë të shmangin një përhapje më të gjerë të kësaj pandemie, që tashmë ka prekur pjesën më të madhe të botës dhe është duke shkaktuar shumë panik.