Shqipëria me koronavirus, qytetarët “mësyjnë” në supermarkete e farmaci
Prindërit në panik para shkollave, pas lajmit të Kryeministrit. Qytetarët sigurojnë rezerva të shumta ushqimesh e medikamentesh
Deri dje, e kishin me të dëgjuar. Vetëm të hënën, qytetarët shqiptarë përballën me rrezikun potencial të prekjes nga virusi i panjohur që po trondit botën.
Pas tij, derivuan masat e paracaktuara më herët, sapo virusi kurorë të konfirmohej zyrtarisht në vend. Ndonëse lajmi i zi u dha zyrtarisht pak minuta pas mesnatës së të dielës, qeveria nuk vendosi dot në kohë për mbylljen e shkollave, mjediseve favoritë për “lulëzimin” e virusit. Habitshëm, ishte vetë Kryeministri, Edi Rama, ai që komunikoi lajmin për pezullimin disajavor të shkollave, në mes të ditës mësimore. Fjala e të parit të qeverisë shkaktoi atë që vetë ai i druhej dhe është munduar ta shmangë këto ditë paniku. Ishin të shumtë prindërit që rreth orës 10: 00 të paradites, me t’u njohur me vendimin, lanë punën e gjithçka tjetër për të mësyrë drejt shkollave, kopshteve e çerdheve, për të marrë të vegjlit e tyre në shtëpi. Kjo krijoi jo pak trafik në rrugë e në ambientet rrethuese të institucioneve arsimore, të mbushura si asnjëherë. Sidoqoftë, në pjesën dërrmuese të tyre, puna vijoi normalisht, deri në përfundim të orarit zyrtar. Në mungesë të mësimit online, siç po e realizojnë në vende të zhvilluara që u prekën nga virusi, vendi ynë po shqyrton mundësi alternative për zhvillimin e mësimit në distancë. SUPERMARKETET Paraditja ishte e vakët. Me të ardhur ora 16: 00, orari zyrtar i përfundimit të punës, kryeqytetasit u dyndën në supermarkete, për të pasur rezerva ushqimore në rast izolimi. “Nuk ka më makarona. Përpara gjysmë ore i mbusha raftet. Nuk ka më as në magazinë, mbaroi furnizimi”, thotë një punonjës supermarketi në zonën e “Misto Mames”. Karroca të mbushura me ushqimet bazë që i duhen një familjeje, për të paktën dy javë.
“T’i kemi, se s’i dihet çfarë ndodh. Po marrim masa. Kemi frikë, shumë frikë”, shprehet një zonjë e moshuar, e cila mezi mban dy qese të mëdha plot e përplot. Përveç rafteve bosh, në sy të bien edhe dezinfektuesit. Një biznes ky, kryesisht i farmacive ( së paku këto dy javë), tashmë është zhvendosur edhe në dyqane. Në një raft të posaçëm ku shiteshin detergjentë të ndryshëm për larje, tashmë i është lënë në dispozicion vetëm dezinfektantëve. Një gjë e tillë lajmërohet që në derë. Alkool etilik për përdorim në sipërfaqe të jashtme, sapun të lëngshëm dhe të ngurtë që largon bakteret dhe viruset 99.9% ( jo 100%!). Në ditën e parë të panikut, nuk u vunë re rritje çmimesh, veçanërisht për produktet në fjalë. Gjithsesi, pushteti vendor kërcënoi pronarët e bizneseve, supermarketeve a dyqaneve ushqimore që abuzojnë me çmimet në këtë periudhë se do të gjobiten dhe procedohen penalisht.
FARMACITË Ashtu si në ditë kur u konfirmua rasti i parë zyrtar në Itali, edhe dje, institucioni më i rëndësishëm për qytetarët ishin farmacitë. Kërkesa, e njëjtë. Maska e dezinfektantë. Nëse deri dje mund të gjeje tek- tuk ndonjërën prej tyre, të hënën, mundësia ishte zero. Vakumi u krijua që në krye të herës, kur shqiptarët u dyndën drejt farmacive. Që të shmangin hyrjet e kota, disa farmaci kanë afishuar një njoftim me shkronja kapitale që në hyrje: S’kemi maska! Më fatlumë janë ata që kanë blerë stok dhjetëra të tilla për t’i pasur dhe iu ka ardhur dita t’i përdorin. Kështu, edhe pse rreziku është ulur këmbëkryq në vend, shumicën e qytetarëve i sheh në rrugë pa maska apo mjete mbrojtëse. Me të marrë lajmin e keq, të shumtë kanë qenë qytetarët që janë adresuar në farmaci me shqetësime nga më të ndryshmet. “Çdo ditë kam klientë që më pyesin mua për medikamente. Por si sot, s’më ka ndodhur. Vetëm gjatë paradites mund të kem pasur me dhjetëra ankesa të ndryshme. Më të trembur janë kryesisht ata në moshë, pasi druhen të marrin numrin 127", tregon një farmaciste në një zonë periferike të qytetit. Frika nga virusi ka bërë që pacientët të mos shkojnë për ndihmë shëndetësore në qendrat shëndetësore pranë vendbanimit të tyre, në lagje, por të kërkojnë ndihmë në farmaci. Shumë të tjerë, njësoj si ushqimet, kanë siguruar edhe rezerva ilaçesh.
Nuk ka më makarona. Përpara gjysmë ore i mbusha raftet. Nuk ka më as në magazinë, mbaroi furnizimi”, thotë një punonjës supermarketi në zonën e “Misto Mames”