Koronavirusi, dezinfektohen mjetet që vijnë nga Rinasi
Në Kukës urdhërohet e njëjta gjë për të gjitha mjetet nga Tirana
Bashkia e Durrësit është angazhuar në zbatimin e planit të masave për parandalimin e koronavirusit në vend. Në një njoftim për shtyp, Bashkia bën të ditur se, në zbatim të urdhrit të qeverisë për mbrojtjen e shëndetit të popullatës nga infeksioni i shkaktuar nga COVID2019, Bashkia e Durrësit me të gjitha strukturat e veta angazhohen në zbatimin e planit të masave si më poshtë: Institucionet arsimore mbyllen për një periudhë dyjavore, duke filluar nga data 09.03.2020. Mbylljen e aktiviteteve publike dhe jopublike të tilla si aktivitete sportive, kulturore dhe konferenca deri në datën 3 prill 2020. Anulimin e grumbullimeve masive në vende të mbyllura apo të hapura të tilla si koncerte, tubime apo dëgjesa publike deri në datën 3 prill 2020. Aplikimin e lëndëve dezinfektuese, me karakter parandalues, në objektet dhe mjetet e transportit publik. Sigurimin e dezinfektimit të përditshëm të mjeteve të transportit që kryejnë transportin në Aeroportin ' Nënë Tereza' dhe portet e vendit. Nga ana tjetër, qytetarët i ka mbërthyer paniku dhe kanë rendur drejt supermarketeve për t'u furnizuar me bazë ushqimore. Bazuar në urdhrin e Ministrisë së Shëndetësisë, edhe Bashkia e
Elbasanit njofton pezullimin e të gjithë aktiviteteve me rastin e Ditës së Verës. Për të evituar grumbullimet dhe për të mbrojtur shëndetin e qytetarëve, festimet do të pezullohen, por elbasanasit do ta festojnë festën e tyre tradicionale pranë familjeve. Në kuadër të masave të mëtejshme mbrojtëse, Bashkia e Elbasanit bën me dije se nga sot nis dezinfektimi i të gjitha ambienteve të institucioneve arsimore, në mënyrë që ato të jenë të gatshme për rifillimin e procesit arsimor. Me urdhër të kryetarit të bashkisë do të nisë menjëherë dezinfektimi i kontenierëve të mbeturinave në qytet e fshat. Pas masave të njoftuara nga qeveria në mbledhjen e mëngjesit, edhe Bashkia Kukës, në plan vendor njoftoi masat e marra. Teksa njoftoi për mbylljen e shkollave dhe çerdheve, Bashkia bëri të ditur se do të merren masa edhe për dezinfektimin e furgonave dhe autobusëve që shkojnë nga Tirana dhe rrethe të tjera. "Sot u mblodh Këshilli i Sigurisë Vendore në Kukës, ku u vendos të merren masa të menjëhershme për mbylljen e institucioneve vendore arsimore si kopshte dhe çerdhe, si dhe gjithashtu për dezinfektimin e të gjitha kopshteve dhe çerdheve. Janë të ndaluara deri me datë 3 prill, të gjitha tubimet, takimet dhe aktivitetet e tjera që kanë fluks personash. Drejtoria e Shërbimeve pranë Bashkisë Kukës ka marrë masat për dezinfektimin e të gjithë ambienteve dhe institucioneve publike, por dhe për mjetet e transportit publik siç janë autobusët dhe furgonat që vijnë nga Tirana si dhe qytete të tjera. Është vendosur një linjë e mirëkoordinuar mes të gjithë institucioneve për marrjen e të gjithë masave të duhura për parandalimin dhe trajtimin e kësaj situate", shkruhet në njoftim. Edhe Bashkua Shkodër ka bërë të ditura masat e marra, duke njoftuar qytetarët për ndalimin e grumbullimit dhe mbylljen e shkollave. Për shkak të koronavirusit, është shtyrë dhe mbledhja e planifikuar e Këshillit Bashkiak. "Në mbështetje të masave të marra nga institucionet qendrore shtetërore, për shkak të situatës së krijuar nga prezenca në vendin tonë të rasteve me COVID- 19, ju njoftoj se mbledhja e Këshillit Bashkiak e planifikuar për nesër, datë 10.3.2020, do të shtyhet deri në një njoftim të dytë", u njoftua dje.