Basha: T'i mbështesim mjekët me mjete dhe fonde
Kryetari i PD- së, Lulzim Basha, doli dje në një konferencë për mediet pas konfirmimit të dy rasteve të para me koronavirusin COVID- 19 në vendin tonë. Duke nënvizuar rëndësinë e qetësisë dhe mbajtjen e panikut larg në këtë situatë, Basha tha se personelit mjekësor duhet t'i vihen në dispozicion të gjitha kushtet e nevojshme për t'i bërë ballë kësaj gjendjeje, që mund të përkeqësohet në ditët e ardhshme. "Thirrje për mjekët. Shëndeti i shqiptarëve është në duart tuaja. Sytë, veshët dhe mendjet e njerëzve, si asnjëherë, janë të fokusuara te ju. Prandaj, sot, të gjithë jemi në mbështetjen tuaj për të zbatuar masat dhe vendimet që ju sugjeroni dhe vendosni. Nuk duhet të ngurroni për asnjë çast të kërkoni çfarë ju nevojitet për të përmbushur misionin tuaj. Qeveritë ikin e vijnë, ata që do të mbeten jeni ju, ata që keni në dorë jetën e gjithsecilit prej nesh, jeni ju. Të dëgjojmë me vëmendje këshillat e mjekëve dhe t'i zbatojmë ato. Kujdes të veçantë duhet të kemi për të moshuarit. Sot nuk është koha për panik, por për kujdes maksimal. Sa më të kujdesshëm të jemi sot, aq më lehtë do ta kalojmë këtë situatë dhe me pasoja minimale", u shpreh kreu i PD- së. Në fjalën e tij, Basha kujtoi edhe një herë tri pikat, ku, sipas tij, duhet të përqendrohet qeveria në përballimin e kësaj situate. "Fondet e mjaftueshme; mobilizimi maksimal; transparenca, këto janë tre komponentë të rëndësishëm politikë, për të cilët nuk duhet humbur kohë", tha Basha. Dje, grupi i punës i ngritur në PD në lidhje me situatën e krijuar nga koronavirusi, paraqiti planin me 11 pika për të përballuar këtë gjendje. Duke filluar që nga masat në pika hyrëse në vend, te ndërgjegjësimi i qytetarëve, PD gjithashtu bën apel që të rriten fondet në dispozicion të shëndetësisë. "1. Komunikim transparent dhe disa herë në ditë me popullatën në lidhje me situatën aktuale dhe masat e marra nga qeveria. 2. Prioriteti i rëndësishëm është marrja e masave urgjente në lidhje me mbrojtjen e personelit shëndetësor e lehtësimin e punës së tyre. 3. Pajisja e personelit me mjetet mbrojtëse. 4. Marrja e masave për pajisjen adekuate me mjetet mbrojtëse për autoambulancat. 5. Bërja gati e çdo strukture të shërbimit parësor apo sekondar spitalor në çdo cep të Shqipërisë. 6. Fuqizimi dhe shtimi i kapaciteteve te laboratorëve, jo vetëm i atyre epidemiologjikë, viralë, por kudo që ato janë. 7. Mobilizimi dhe vënia në dispozicion e gjithë personelit mjekësor, i cili sot nuk është aktiv, mjekë epidemiologë, infeksionistë apo edhe të specialiteteve të tjera dhe që janë aktualisht në pension. 8. Rritja e kujdesit dhe promovimi i masave parandaluese për të gjithë popullatën në medie. 9. Karantinim i detyruar për personat që kanë kontakt me të infektuarit dhe vetëkarantinim vullnetar për personat që vijnë nga zona të infektuara. 10. Sigurimi i fondeve të detyrueshme nga ana e qeverisë. 11. Zbatimi me përpikëri i të gjithë masave dhe protokolleve nga OBSH", rekomandojnë ekspertët e PD- së. Basha dje anuloi edhe disa takime me qytetarë pas rasteve pozitive me koronavirus.