Virusi, Conte shpall të gjithë Italinë “zonë të mbrojtur”

Kryeministri italian: Para shëndetit bien prioritetet e tjera

Italia nuk do të ketë më zona të kuqe apo të verdha, i gjithë territori do të ketë rregulla të njëjta për frenimin e përhapjes së koronavirusit.

Italia do të jetë e gjithë një “zonë e mbrojtur”. Në mbrëmje, Kryeministri Giuseppe Conte e bëri deklaratën pas një kërkese të krerëve të komunave në të gjithë vendin, të cilët kërkojnë masa më drastike për ndalimin e përhapjes së koronavirusit. Paraprakisht, lajmi u dha nga ministri për Raportet me Rajonet, Francesco Boccia, i cili foli për “homogjenizim rregullash progresive në të gjithë territorin kombëtar”. Masat do të përhapen në të 14 rajonet italiane. Qytetarëve u është kërkuar që të qëndrojnë në shtëpi dhe mund të lëvizin vetëm ata që kanë leje për çështje të provuara pune, emergjencash të tjera të provuara apo emergjenca shëndeti. Kryeministri kërkon bashkëpunimin e të gjithëve. “E di që është shumë e vështirë, por kur bëhet fjalë për shëndetin, duhet të lëmë mënjanë prioritetet e tjera. Duam bashkëpunimin tuaj që të gjitha masat të funksionojnë me vullnetin e të gjithëve: ‘ Unë qëndroj në shtëpi’”, tha mes të tjerash Conte, duke e shpallur Italinë të gjithë një zonë të mbrojtur me rregulla të forta dhe ndëshkime të forta për shkeljen e tyre. “Nuk ka më kohë”, tha Kryeministri. Conte iu bëri thirrje edhe të rinjve që të zbatojnë kërkesat e qeverisë dhe të mos mblidhen duke pirë nëpër lokale dhe rrugë në turma, pasi shumë prej tyre kanë rezultuar në prekur. Masat kanë pasur një reagim agresiv, kryesisht nëpër burgjet e Italisë. Protestat deri të hënën janë shpërndarë në 27 lokacione të ndryshme dhe gjashtë të burgosur kanë mbetur të vdekur pas përleshjeve dhe përplasjeve më Policinë në burgje, menjëherë pas njoftimit të masave se do të ndalohen vizitat ballë për ballë me familjarët e tyre dhe se lëvizjet e të burgosurve do të limitohen. Sipas të dhënave zyrtare, në nivel kombëtar në Itali janë 9172 të infektuar, 463 viktima dhe 724 të shëruar. Nga të infektuarit, 733 janë në terapi intensive, 4316 po kurohen në strukturat spitalore e 2836 të tjerë në kushte shtëpie. Autoritetet deklarojnë se ata që humbasin jetën, janë njerëz të moshuar ose njerëz me probleme të tjera shëndetësore. Rajoni i Toskanës ka konfirmuar dy personat e parë pozitivë.