Depolitizimi i administratës zgjedhore prish konsensusin
Damian Gjiknuri: ODIHR të bëjë formulimin për këtë çështje
Propozimet për depolitizimin e administratës zgjedhore “thyen” konsensusin e deritanishëm të palëve në tryezën e këshillit politik për Reformën Zgjedhore.
Të dyja palët, përfaqësuesi i maxhorancës në tryezë, Damian Gjiknuri, dhe përfaqësuesi i opozitës, Oerd Bylykbashi, akuzuan njëritjetrin se kanë bërë propozime të njëanshme. Për të arritur një propozim të pëlqyer nga të dyja palët, Gjiknuri u shpreh në përfundim të takimit se do t’u drejtohen ekspertëve të OSBE/ ODIHR për të bërë formulimin e neneve. “Ne mendojmë se ka ardhur momenti dhe meqenëse ka pasur edhe një draft të përgatitur nga ekspertë teknikë të komisionit, ekspertiza e ODIHR të japë një opinion në lidhje me këto propozime. Pra, ODIHR të thotë se cili prej këtyre propozimeve është më afër adresimit të rekomandimit të kahershëm, që është depolizitim dhe departizim i procesit zgjedhor”, tha Gjiknuri. Por, sipas Bylykbashit, deklarata e Gjiknurit është një gënjeshtër, pasi ekspertët e ODIHR janë gjatë gjithë kohës në mbledhjet e këshillit politik dhe japin mendimet e tyre. “Ekspertët e ODIHR janë këtu për të na asistuar e për të gjetur konsensusin. Opinioni i ODIHR jepet në formë zyrtare bashkë me Venecian. Ajo që marrim këtu është ekspertizë për draftimin e zgjedhjeve. ODIHR dhe Venecia japin opinion të përbashkët pasi të jetë përfunduar drafti. Tentativa e z. Gjiknurit në emër të maxhorancës për të rrëmbyer procesin do të dështojë me turp në tryezën e këshillit politik”, tha Bylykbashi.
DEPOLITIZIMI Përfaqësuesi i maxhorancës në tryezën e Reformës Zgjedhore, Damian Gjiknuri, tha se propozimet e PD- së dhe të aleatëve nuk synojnë departizimin e komisionerëve, por një sistem miks, që në fund vendimmarrje kanë të zgjedhurit nga përfaqësuesit partiakë. “Për sa u përket propozimeve të PD- së në lidhje me administrimin e zgjedhjeve, dua të them se ishte një opsion, i cili nuk çonte në departizimin dhe depolitizim, siç ka qenë rekomandimi i kahershëm i ODIHR. Ju e dini se ODIHR nënvizon se zgjedhjet në Shqipëri nuk duhet të menaxhohen më nga partitë. Propozimi i bërë nga PD, përkundrazi, është një sistem i përforcuar i përfaqësimit politik, por që fut ndonjë element të administrimit teknik pa vendimmarrje, do të thotë që vendimmarrjet kryesore prapë i kanë përfaqësuesit politikë”, tha Gjiknuri. Ndërsa Bylykbashi akuzoi maxhorancën se në propozimet e ekspertëve të tyre, menaxhimin e zgjedhjeve nuk ua lënë në dorë partive, por vetëm qeverisë. “Propozimi i maxhorancës ka vetëm dy forma. Ose pranoni versionin ekzistues, ose të kalojë në një model që komisionerët do të jenë të pavarur nga partitë politike, por do të jenë totalisht të varur nga qeveria. Nën lëkurën e administratës publike të pavarur që nuk ekziston, duan që komisionerët e PS- së të jenë ata që do manipulojnë votimin, siç e patë në 2019. Nuk mund të pranohet një qasje e tillë. Qëndrimi intransigjent i propozimit të opozitës gjithashtu u përvijua në një linjë që mund të çojë shumë shpejt drejt një miratimi të njëanshëm të drafteve të PS- së. Ne do të luftojmë deri në minutën e fundit për një draft me konsensus, që u shërben shqiptarëve”, tha Bylykbashi. Por cili është propozimi i palëve për depolitizimin e administratës zgjedhore. Ekspertët e kontraktuar nga Kuvendi propozojnë shkrirjen e KQZ- së dhe zëvendësimin me tri hallka të tjera, që nuk janë të propozuara nga partitë. Po ashtu, ata propozojnë që komisionerët të mos propozohen nga partitë, por të vijnë nga administrata shtetërore si mësues, mjek, etj. Ndërsa, nga ana tjetër, opozita e bashkuar propozon një sistem miks, ku komisionerët do të jenë jopartiakë, por do të ketë një numër të përbashkët monitoruesish që propozohen nga partitë politike, të cilët do të kenë të drejtën e vendimmarrjes.