Pasuria e ish- Kryeprokurorit Llalla, nën sekuestro
Struktura e Posaçme Antikorrupsion ( SPAK) njoftoi zyrtarisht dje se i ka kërkuar Gjykatës së Posaçme të marrë të pandehur ish- Prokurorin e Përgjithshëm, Adriatik Llalla, për mosdeklarim pasurie.
Sipas njoftimit zyrtar, SPAK- u ngarkon me përgjegjësi Llallën për mosdeklarim të kryer tri herë, ndërsa duket se akuzat për të cilat është regjistruar fillimisht çështja, janë rrëzuar. Pas dy vitesh hetime dhe pas marrjes së informacioneve nga letërporositë e dërguara, duket se Prokuroria arriti të dokumentonte vetëm mosdeklarimin, që më herët ishte konstatuar edhe nga Komisioni i Pavarur i Kualifikimit, organ i vetingut. “Prokuroria e Posaçme kundër Korrupsionit dhe Krimit të Organizuar Tiranë ka përfunduar hetimet paraprake për procedimin penal nr. 65, viti 2019, në ngarkim të shtetasit Adriatik Llalla, me funksion ish- Prokuror i Përgjithshëm i Republikës së Shqipërisë. Në përfundim të hetimeve paraprake, pasi janë kryer të gjitha veprimet e mundshme dhe të nevojshme hetimore, pasi janë vlerësuar të gjitha provat e administruara gjatë hetimeve, shtetasi Adriatik Llalla është marrë i pandehur dhe i është njoftuar akuza për kryerjen e veprës penale: “Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër, që ka detyrimin ligjor për deklarim, të kryer tri herë, të parashikuar nga neni 257/ a, paragrafi ( 2) i Kodit Penal”, shkruhet në njoftimin e SPAK- ut. Kujtojmë se Departamenti i Shtetit Amerikan shpalli person non grata ish- Kryeprokurorin, me argumentin se ishte i përfshirë në raste të korrupsionit madhor dhe i ndaloi hyrjen në SHBA atij dhe familjes. HETIMET DHE VETINGU
Hetimet për ish- kreun e Akuzës nisën nga Prokuroria e Durrësit, më pas kaluan për kompetencë në Prokurorinë për Krime të Rënda, tani të emërtuar Struktura e Posaçme Antikorrupsion ( SPAK). Në fokus të hetimeve ka qenë pasuria e Adriatik Llallës, ndërsa ka qenë materiali i Komisionit të Pavarur të Kualifikimit që çoi në nisjen e hetimeve. Prokuroria zgjati në disa raste hetimet përgjatë kësaj kohe, ndërsa në çdo rast, Adriatik Llalla, nëpërmjet avokatit të tij, ka kundërshtuar vendimin, duke kërkuar mbylljen e tyre. Ish- Prokurori i Përgjithshëm Adriatik Llalla, i pari që është hetuar penalisht, dha dorëheqjen, duke i shpëtuar kështu procesit të vetingut. Dorëheqja e Llallës erdhi në një moment që Komisioni i Pavarur i Kualifikimit, Shkalla e Parë e procesit të rivlerësimit për magjistratët kishte kryer një hetim administrativ dhe nga sa rezultoi më vonë, do t’i kishte ngarkuar atij barrën e provës për kriterin e pasurisë. KPK- ja ndërpreu procesin e vetingut për Llallën, ndërsa vendimi u kundërshtua nga Komisioneri Publik, që kërkoi që në pjesën urdhëruese të vendimit për ndërprerjen e rivlerësimit të shtohej edhe ndalimi që Llalla të kthehej në sistem për 15 vite. Kërkesa e Komisionerëve u pranua nga Shkalla e Dytë e vetingut, Kolegji i Posaçëm i Apelimit.
Në korrik të vitit 2018, Gjykata e Krimeve të Rënda, me kërkesë të Prokurorisë sekuestroi pronat e ish- Prokurorit të Përgjithshëm. Vendimi për sekuestrimin mbeti në fuqi edhe në Gjykatën e Apelit. Ndërkohë, me anë të një njoftimi për shtyp, Prokuroria e Krimeve të Rënda bëri të ditur në atë kohë se Llallës iu vendosën nën sekuestro një apartament 67 metra katrorë në Durrës dhe katër parcela toke me sipërfaqe të përgjithshme prej rreth 22 mijë metrash katrorë. “Si rezultat i veprimeve hetimore të kryera, janë krijuar dyshime të arsyeshme se disa pasuri të paluajtshme në zotërim të shtetasit Adriatik Llalla përbëjnë produkt të veprës penale. Me vendimin nr. 179, datë 20.07.2018 të Gjykatës së Shkallës së Parë për Krime të Rënda Tiranë, është vendosur pranimi i kërkesës së Prokurorisë, vendosja e masës së sigurimit pasurore “sekuestro preventive”, njoftoi Prokuroria rreth dy vite më parë.