Operacioni “Besa” në Itali, arrestohet një i dyshuar në Vlorë
Një tjetër operacion ndërkombëtar është finalizuar për goditjen e veprimtarisë kriminale në fushën e trafikimit të narkotikëve. Operacioni i koduar “Besa 2018”, i organizuar dhe zhvilluar nga Policia italiane, në bashkëpunim me Policinë shqiptare, hungareze dhe atë turke. Guardia di Finanza në Treno ka ekzekutuar 25 urdhra arresti ndaj një grupi kriminal, që operonte në provincën e Bolcanos dhe në rajonin e Venetos. Ndërkohë që në Shqipëri, operacioni u drejtua nga Drejtoria Hetimore Qendrore, në bashkëpunim me Forcën e Posaçme Operacionale në Policinë e Shtetit dhe Policia e Vlorës. Gjatë operacionit, në Vlorë janë ushtruar disa kontrolle banesash dhe është ekzekutuar në ambientet e burgut urdhri i ndalimit për shtetasin Enton Kurti, i cili ishte arrestuar nga Policia e Vlorës në dhjetor të vitit 2019, për veprën penale “Prodhimi dhe shitja e narkotikëve”. Operacioni në Shqipëri, falë procedurave të bashkëpunimit ndërkombëtar të Interpol ZQK Tirana dhe Interpol Roma, zyrave ndërlidhëse në Bari e Romë të Policisë së Shtetit dhe Zyrës Uci Albania të Policisë Italiane në Tiranë. Operacioni i koduar “Besa 2018” ka filluar në vitin 2018 dhe është përmbyllur me arrestimin e 22 subjekteve në Itali dhe 3 jashtë saj. Policitë homologe në Shqipëri, Hungari dhe Turqi kanë bashkëpunuar për zbardhjen e skemës së funksionimit të grupit kriminal. Në kuadër të operacionit, gjatë dy vitesh hetime janë arrestuar 12 persona në flagrancë, prej të cilëve 8 shqiptarë, 2 tunizianë, 1 zviceran e 1 italian, ndërkohë që 6 të tjerë, 4 italianë dhe 2 shqiptarë janë hetuar në gjendje të lirë. “Policia e Shtetit përditë e më shumë po tregon profesionalizëm dhe besueshmëri të lartë te partnerët, duke u radhitur e barabartë mes tyre në çdo operacion ndërkombëtar në luftën kundër krimit të organizuar dhe terrorizmit”, tha dje zyrtarisht Policia e Shtetit. Sipas karabinierisë, organizata ishte e përbërë kryesisht nga shtetas shqiptarë, me kontakte të drejtpërdrejta me kartelet kryesore të trafikut të drogës në Amerikën e Jugut. Kokaina, hashashi dhe marijuana tregtoheshin nga anëtarët e bandës. E para e dërguar nga Gjermania dhe Zvicra vinte nga portet kryesore të Holandës, dy të tjerat nga Shqipëria. Shumë prej të dyshuarve ishin vendosur në zonat periferike të Meranos, duke shpresuar se ndoshta nuk do të tërhiqnin shumë vëmendje, por aktiviteti i tyre mbulonte tërë Tyrolin e Jugut dhe gjithashtu krahinën e Vicenzës. Dy prej të arrestuarve u identifikuan në Palagiano dhe Massafra në provincën e Tarantos, por e shpërndanin drogën në një klub nate dhe në dy piceri në Merano dhe Appiano.