Agron Tufa publikon emrat: Ja 330 xhelatët e diktaturës
Studiuesi: Lista është hartuar në bazë të dëshmive të viktimave të këtyre xhelatëve, por edhe të konfirmuara në arkivat zyrtarë
Prej Zvicrës, ku ka kërkuar azil politik, Agron Tufa publikoi ditën e djeshme një listë me 330 emra të personave që kanë kryer krime në komunizëm, të cilët ai i quan "xhelatë" të diktaturës.
Sipas studiuesit, kjo listë, nëse do të ishte e plotë, do t'i kalonte 1300 emra. Tufa siguron për besueshmërinë e kësaj liste, duke u shprehur se ajo bazohet në dëshmitë e viktimave që janë përballur me këta "xhelatë", si dhe në të dhënat e arkivave zyrtarë. Në listë mësohet të jenë emra ish- zyrtarëve të lartë, të cilët kanë mbajtur poste me rëndësi vendimmarrëse, si ai i prokurorit Pirro Sula. Nikolin Kurti, vë në dukje se Sula, është prokurori që ka dhënë vendimin për ekzekutimin e priftit katolik, Dom Shtjefën Kurti. "Dom Shtjefën Kurti është zhdukur nga morgu i Spitalit të Tiranës, ku trupi i tij u përdor si kadavër nga Fakulteti i Mjekësisë, ndërsa prokuror Pirro Suli jeton në Miçigan- USA, si qytetar amerikan", thotë Kurti, i cili ka studiuar jetën e priftit dhe ka përgatitur një dokumentar për të. Ndërkohë, në krye të listës, është emri i Aranit Çelës, një ndër prokurorët dhe gjyqtarët më famëkeq të regjimit komunist, i njohur për kontributin e tij në mbi 650 procese politike. Çelën, historianët e cilësojnë si Vishinski i komunizmit në Shqipëri. Disa prej emrave të tjerë të këtyre "xhelatëve", që ushtruan dhunë ndaj kundërshtarëve të regjimit komunist, janë publikuar për herë të parë në gazetën "Ringjallja", në mars të vitit 1993.
POSTIMI I PLOTË I STUDIUESIT:
"Lista e mëposhtme është tepër larg së qeni shteruese; ajo është hartuar në bazë të dëshmive të viktimave të këtyre xhelatëve, por edhe të konfirmuara në arkivat zyrtarë. Nëse do të kishte një listë pak a shumë të plotë, numri do të shkonte, minimumi, katërfishi i shifrës 330 këtu...", shprehet Tufa. Prej disa muajsh larg Shqipërisë, studiuesi vijon "misionin" për të hedhur dritë mbi ngjarjet më të errëta të diktaturës. Ndonëse nga "kundërshtarët" largimi i tij u quajt si "arratisje", shumë personalitete të letrave, kulturës e historisë i dolën në mbrojtje.