Koronavirusi nuk ndalet, dy vatra të reja në Tiranë dhe Durrës
Nga testet rezultuan pozitivë edhe 4 qytetarë të tjerë. Veç 31- vjeçarit në Tiranë, edhe një grua e infektuar në qytetin bregdetar
Në harkun e 48 orëve në vendin tonë janë raportuar 10 persona të prekur nga koronavirusi, 8 prej të cilëve nga e njëjta familje.
Ndërkohë, dy rastet e tjera nuk kanë asnjë lidhje me pacientin e konsideruar nga Ministria e Shëndetësisë edhe si "pacienti 0". Bëhet fjalë për një grua, e cila aktualisht është duke marrë mjekim në spitalin e Durrësit si edhe një 31- vjeçar nga Tirana, i cili prej mbrëmjes së të hënës gjendet i shtruar në spitalin infektiv të QSUT- së. "Deri sot në Institutin e Shëndetit Publik janë testuar 114 raste të dyshuara, nga të cilat vetëm 10 kanë rezultuar pozitive. Këtu përfshihen dy të sëmurët e parë, 6 persona të tjerë që janë kontakte të këtyre të sëmurëve, pra të sëmurëve të parë dhe dy raste të reja të palidhura me dy rastet e para. Kemi një të sëmurë, i cili është i shtruar në Spitalin Infektiv dhe që ka një histori udhëtimi njëditore në Milano. Gjithashtu, kemi një tjetër person që është i shtruar në Spitalin e Durrësit. Pra, aktualisht vetëm 3 persona janë në Spitalin Infektiv për trajtim, 6 persona të tjerë janë izoluar në kushte shtëpie. Ndërkohë që pacientja e konfirmuar pozitive në Durrës është në Spitalin e Durrësit ku edhe po merr mjekim", tha zv. ministrja e Shëndetësisë, Mira Rakacolli, pas mbledhjes së Task- Forcës. Trajtimi i tyre në kushte shtëpie po bëhet për shkak të mosshfaqjes së simptomave. Sipas Rakacollit, me rëndësi për 6 personat e tjerë që po ashtu kanë rezultuar pozitiv është që të qëndrojnë në shtëpi dhe të shmangin kontaktet me personat e tjerë. "Për njerëzit asimptomatik edhe pse mund të jenë mbartës vlejnë këshillat për higjienë, kufizim të kontakteve. Pra, nuk ka arsye për të marrë mjekim. Prandaj është e rëndësishme që këta njerëzve të rrinë të mbyllur apo të karantinohen, sepse vëzhgohet sjellja e tyre dhe njëkohësisht pengohet dalja e tyre në publik". PERSONAT E KONTAKTIT Masa janë ndërmarrë edhe për personat e afërt apo ata që kanë pasur kontakt me personat e infektuar. Ministria e Shëndetësisë nuk ka dhënë informacion mbi numrin e tyre, por ka bërë me dije vetëm që ndaj këtyre personave është marrë masa e izolimit në shtëpi për një periudhë 2- javore, që është edhe koha e inkubacionit të virusit. "Të gjithë personat e dyshuar si mbartës, pra që kanë pasur kontakt me personat e infektuar, do të qëndrojnë në shtëpi për të paktën një periudhë 14- ditore". Aktualisht priten përgjigjet e analizave për 18 qytetarë të tjerë. Ndërkohë që diagnostikimi i vonuar përbën rrezik të shtuar për kontaktet që këta persona kanë pasur, gjë e cila ndikon në zgjerimin e rrethit të personave që mund të jenë mbartës të virusit, por që ende nuk e dinë. Gjithë vëmendja është e përqendruar te masat për mbrojtje. Për këtë, në mënyrë të vazhdueshme, Ministria e Shëndetësisë u ka bërë apel qytetarëve që në momentin që ju shfaqen simptomat e para, të telefonojnë në numrin e urgjencës, 127. Apeli i dytë vjen për vetëkarantim. Të gjithë personat që kanë pasur një histori udhëtimi në vendet e prekura, duhet që për të paktën një periudhë 2- javore, të qëndrojnë në shtëpi, duke shmangur kontaktin me personat e tjerë. Ndonëse nga Instituti i Shëndetit Publik është bërë me dije se këto raste po monitorohen, ende nuk ka një shifër të personave që po qëndrojnë të mbyllur në shtëpi, si masë paraprake për të mosfavorizuar përhapjen e virusit.