Parlamenti sfidon virusin, vazhdojnë mbledhjet
Nëpër komisione thyhen rregullat e shpallura nga qeveria
Pas rasteve të para të konfirmuara me koronavirusin COVID- 19, Shqipëria ka ngritur kambanat e alarmit, duke marrë një sërë masash për të parandaluar përhapjen e tij. Qeveria dhe autoritetet shtetërore janë vende në gatishmëri të plotë dhe krahas tyre është vendosur që të mbyllen shkollat dhe të anulohet çdo aktivitet që parashikonte grumbullime njerëzish. Madje për ato vende pune që nuk janë mbyllur ende, qeveria ka vendosur që të ketë një zonë sigurie, që parashikon 1 metër distancë mes çdo personi. Ky rregull vlen edhe për lokalet, restorantet, apo çdo institucion tjetër, përveç Kuvendit. Që nga dita e hënë, kur në vend u ngrit alarmi, pasi u zyrtarizuan dy rastet e para me koronavirus, Kuvendi e ka vijuar normalisht punën e tij nëpër komisione. Pothuajse në të gjitha komisionet parlamentare ka vijuar puna, edhe pse ambientet e sallave nuk mundësojnë plotësimin e kriterit të vendosur për të qëndruar çdo person 1 metër distancë nga njëri- tjetri. Madje në mbledhjet e zakonshme të komisioneve në këto ditë, nuk ishin të rralla kollitjet apo teshtimat e ligjvënësve në moshë të thyer, por as kjo gjë nuk ka bërë që Kuvendi t'i ndërpresë punimet deri në normalizimin e gjendjes. Nga kjo situatë, janë të rrezikuar ata që duhet të bëjnë ligje për të përmirësuar jetën e qytetarëve shqiptarë, por edhe gazetarët e terrenit që janë në kontakt të vazhdueshëm, duke u bërë kështu edhe persona me risk të lartë për t'u bërë mbartës të COVID- 19. Ditën e hënë, disa deputetë i thanë konfidencialisht gazetës "Panorama" se punimet e Kuvendit do të vazhdojnë normalisht, përderisa nga punonjësit e këtij institucioni, deputetë, apo edhe gazetarë, nuk ka të prekur. Në rastin e parë që do të konstatohet ndonjë individ nga këto kategori, Kuvendi do t'i ndërpresë punimet. Mbetet për t'u parë nëse do të zhvillohet seanca plenare e planifikuar për datën 12 mars.