' Izolohet' Shqipëria, anulohen udhëtimet me Italinë
"Izraeli anulon fluturimet nga Tirana për muajin prill"
Shqipëria ka ndërprerë komunikimin ajror dhe atë detar me Italinë.
Vendimi është bërë i ditur dje, nga ministrja e Infrastrukturës, Belinda Balluku. Sipas ministres, të gjitha linjat ajrore me Italinë nuk do mund të marrin dhe sjellin pasagjerë me të gjitha desitnacionet në Itali dhe linjat e fundit të trageteve ishin mbrëmjen e djeshme drejt Barit dhe Brindisit nga Vlora dhe Durrësi. Ministrja Balluku theksoi në fjalën e saj se ky është një vendim drastik, që vjen si një nevojë për të parandaluar ardhjen e personave të tjerë të infektuar me koronavirus nga vendi Apenin. "Sot kemi vendosur që të ndërpresim të gjitha akseset e transportit ajror dhe detar në zonat e kuqe dhe zonat përreth në Itali. E dimë që është një vendim drastik, por është marrë në një situatë të jashtëzakonshme. Ju bëj thirrje që duhet ruajtur qetësia, nuk ka arsye për panik. Duhet bashkëpunim nga ana e qytetarëve", tha Balluku në fjalën e saj para gazetarëve. Në prononcimin për mediat, Balluku specifikoi se urdhri i ndalimit do të jetë vetëm për pasagjerët, e ndërsa mallrat do mund të qarkullojnë normalisht, siç ka ndodhur deri më tani. "Urdhri për ndalimin e fluturimeve u referohet vetëm pasagjerëve. Sa u përket mallrave, nuk bëhet fjalë që të kemi pezullim të avionëve cargo. Gjithashtu, u referohem edhe aviacionit civil, që ka lënë të hapur Aeroportin e Romës, si një hap për të shpërndarë pasagjerët që bllokohen në destinacionet Europiane. Do ishte shumë mirë që të gjitha kompanitë të merrnin masa në të mirë të qytetarëve, të mbërrijnë në destinacione që të aksesojnë më pas në destinacionin final ku donin të shkonin. Të gjithë pasagjerët që duan të ndryshojnë kohën e biletës, t'u jepet mundësia që ta rirezevojnë për një moment të dytë. Linja DurrësAnkona- Trieste është një linjë kalendarike për udhëtarët, jo e mallrave. Pezullimi qëndron në fuqi deri në një vendim të dytë", u shpreh ministrja Belinda Balluku. Ky vendim i qeverisë, vjen pas atij të së hënës, ku fillimisht u mbyllën vetëm linjat ajrore me qytetet veriore të Italisë. Sakaq, edhe kompania izraelite, "IsrAir", ka anuluar fluturimet nga Shqipëria drejt Izraelit dhe anasjelltas. "Njoftojmë qytetarët shqiptarë se si pasojë e përhapjes së koronavirusit dhe instruksioneve të marra nga autoritetet izraelite, janë anuluar të gjitha fluturimet e planifikuara për sezonin e ri turistik 2020, që do nisnin në datën 5 prill, gjithsej 9 fluturime për këtë muaj, nga kompania ' IsrAir'", thuhet në deklaratën e ambasadës izraelite në vendin tonë. Pas këtyre dy vendimeve, destinacionet e mbetura nga ku mund të fluturohet nga Aeroporti i Rinasit, janë vetëm 13. Stambolli, Parisi, Amsterdami, Budapesti, Athina, Vjena, Frankfurti, Dortmundi, Dyseldorfi, Memmingen, Brukseli, Beogradi dhe 3 aeroportet e Londrës, janë të vetmet vende, drejt të cilave qytetarët shqiptarë mund të shkojnë këto ditë.