Rama e Basha përplasen për maskat e skaduara, PD kërkon hetim nga Prokuroria
Kreu i PD- së: "Provë e një akti të vetëdijshëm kriminal". Rama: "Rrëmoni si minj për të nxjerrë të paqenat e u hidhni njerëzve helm"
Kryetari i Partisë Demokratike, Lulzim Basha, akuzoi qeverinë për papërgjegjshmëri në lidhje me pajisjen e stafit mjekësor me 1 milion e 200 mijë maska, skandenca e të cilave ka përfunduar në dhjetor të 2011.
Basha ka kërkuar hetimin nga ana e Prokurorisë për këtë akt, i cili, sipas tij, e ekspozon personelin mjekësor para koronavirusit, duke mos i dhënë mundësi t'u shërbejnë siç duhet dhe pacientëve. Kryeministri Rama iu përgjigj fillimisht akuzave të kryedemokratit në "Twitter", duke shkruar se të vetmet maska të dëmshme në Shqipëri janë maskat e atyre që s'ndalen së kërkuari pushtet me shpifje, sherr, rrëmujë. Edhe gjatë mbledhjes së djeshme të qeverisë, Kryeministri vijoi përgjigjen ndaj Bashës, duke vlerësuar qëndrimin e tij ditën e parë të evidentimit të rasteve me koronavirus. "Më erdhi shumë mirë dje kur kryetari i opozitës mbajti një fjalë para opinionit publik, që ishte fjala e mbajtur nga të gjithë, si vëllezërit apo si motrat, në të njëjtin pozicion në të gjitha vendet që janë në luftë, por sot gjithçka ndryshoi dhe ndryshoi duke nxitur panik përmes dizinformimit", u shpreh Rama në mbledhjen e qeverisë. Por gjatë gjithë pasdites së djeshme, Rama dhe Basha vijuan replikat e tyre përmes rrjeteve sociale. Kreu demokrat iu përgjigj Ramës se "në vend që të sulmojë opozitën, duhet të japë llogari pse ka shpërndarë 1.2 milionë maska të skaduara". "Gënjeshtrat dhe sulmet kundër opozitës nuk i shërbejnë as sigurisë dhe as jetës së shqiptarëve! Janë mijëra burra, gra dhe fëmijë që duhen mbrojtur", shkruante Basha. Po përmes "Twitter"- it, Kryeministri e cilësoi djallëzore qëndrimin e opozitës, e cila, sipas tij, kërkon t'u hedhë helm qytetarëve. "Është djallëzore që pikërisht tani dhe kur të gjithë duhet të jemi bashkë, nuk ndieni përgjegjësinë më minimale ndaj atyre që përfaqësoni dhe ndaj atyre njerëzve që duhet të jepni një kontribut", shkruan Rama.