Balla: Histeri e një tufe politikanësh të paskrupuj
Sekretari i përgjithshëm i PS- së, Taulant Balla, reagoi ashpër ndaj kreut të opozitës, Lulzim Basha, dhe ishKryeministrit Sali Berisha, pas denoncimeve se maskat e shpërndara për personelin mjekësor ishin të skaduara. Me një shënim në "Facebook", Balla i drejtohet me fjalët "politikanë të pashpresë", ndërsa thotë se janë të gatshëm të përdorin një epidemi botërore si koronavirusi për të shpërndarë panik. "Në asnjë vend në botë nuk ndodh kjo. Në Itali, kryetari i Partisë Demokratike u prek vetë nga koronavirusi dhe nuk mallkoi askënd, thjesht u tërhoq për t'iu vënë në dispozicion karantinimit dhe mjekëve", shkruan mes të tjerash Balla. Ai akuzoi ish- Kryeministrin Berisha, se me video të montuara kërkon të krijojë pasiguri te qytetarët në lidhje me punën e punonjësve të mjekësisë. "Politikanë të pashpresë, ushtarë të dëshpëruar të së keqes, të gatshëm të përdorin edhe një epidemi botërore si koronavirusi, për të shpërndarë panik, nxitur ankth, kërkuar rrëmujë apo demoralizuar mjekët dhe infermieret. 48 orët e fundit janë një shpërthim histerie, në krye të së cilës shfaqet si gjithmonë Sali Berisha, cili ka shtuar numrin e postimeve të rreme. Me paturpësinë malinje që e karakterizon, ai poston video nga Irani, se gjoja ato pamje janë në Tiranë. Pas Saliut vjen natyrshëm dështaku epokal Lulzim Basha, me lloj- lloj përpjekjesh, që synojnë të demoralizojnë ekipet e mjekëve dhe infermiereve si dhe të rrisë sa më shumë panikun. Qeveria shqiptare dhe shërbimi ynë shëndetësor në bashkëpunim më OBSH do t'ia dalin ta përballojnë këtë situatë. Të gjithë duhet thjesht të ndjekim udhëzimet e specialistëve dhe të qeverisë", shkruan Balla.