VASILI: MASKAT E SKADUARA, VEPRIM KRIMINAL

Nënkryetari i LSI- së, Petrit Vasili, hodhi akuza në drejtim të Kryeministrit Rama, në lidhje me faktin se në tregun shqiptar, sipas tij, janë shpërndarë maska të skaduara. Vasili shkruan se maskat e skaduara të hedhura në treg janë veprim kriminal i Ramës, duke shtuar se kreu i qeverisë duhet të largohet menjëherë dhe të merret në hetim. "Maskat e skaduara, veprim kriminal - Edi Rama të largohet menjëherë dhe të merret nën hetim. Veprim kriminal i Kryeministrit shpërndarja e maskave të skaduara. Krim ndaj mijëra mjekëve e infermierëve dhe mjaft punonjës të tjerë të shtetit, që në vend që të mbrohen, i ekspozohen rrezikut me maska të skaduara. Krim ndaj mijëra shqiptarëve, që i përdorin ato. Si mundet përballë pandemisë së koronavirusit Kryeministri, në mënyrë kriminale, i ekspozon shqiptarët dhe personelin mjekësor pa mbrojtje, duke i shndërruar në viktima. Ky është kulmi, të largohet dhe të japë dorëheqjen. Kryeministri që vret shqiptarët, s'mund të rrijë asnjë sekonde më në karrige, sepse nuk është zgjidhje, por rrezik i madh", shkruan Vasili.

Presidenti Meta priti dje në një takim në Presidencë, ministren e Shëndetësisë, Ogerta Manastirliu, duke u njohur nga afër me masat e marra për përballimin e pandemisë së koronavirusit.

Teksa nënvizon rëndësinë e bashkëpunimit të ngushtë mes institucioneve, kreu i shtetit kërkon marrjen e masave për mbrojtjen e personelit shëndetësor. Përmes një deklarate për takimin, kreu i shtetit ka shprehur shqetësimet e tij në lidhje me përmirësimin e reagimit të institucioneve. "Theksova domosdoshmërinë e rritjes së bashkëpunimit të ngushtë mes institucioneve, veçanërisht me qytetarët, si dhe përfshirjen e kapaciteteve njerëzore e shkencore, edhe jashtë shërbimit aktiv shëndetësor, duke e konsideruar këtë hap si vendimtar për suksesin e tejkalimit të kësaj sfide madhore. U interesova për gjendjen aktuale shëndetësore të qytetarëve të prekur nga koronavirusi dhe shpreha falënderimin dhe mirënjohjen time për të gjithë mjekët, infermierët, sanitarët dhe personelin mbështetës, që është duke shërbyer me profesionalizëm dhe përkushtim maksimal. Nënvizova rëndësinë e marrjes së plotë të masave mbrojtëse për personelin shëndetësor dhe përshëndeta mbështetjen financiare shtesë të miratuar nga qeveria për ta", është shprehur Presidenti. Ai ka kërkuar transparencë dhe përgjegjshmëri nga të gjitha institucionet. "Duke theksuar se shëndeti i çdo qytetari është prioriteti ynë kryesor dhe se në këtë situatë kërkohet përgjegjshmëri maksimale, bashkëpunim i menjëhershëm, profesionalizëm, përkushtim dhe transparencë, i ftoj të gjithë qytetarët të respektojnë me përpikëri dhe rigorozitet protokollet shëndetësore, këshillat e stafeve të specializuara mjekësore, të ndjekin dhe të zbatojnë vetëm sugjerimet e institucioneve shtetërore dhe për çdo shqetësim t'i drejtohen numrit 127, të vendosur në dispozicion nga Ministria e Shëndetësisë, thuhet në deklaratën e kreut të shtetit për këtë takim.