Koronavirusi gjunjëzon drejtësinë, mbyllen gjykatat, bllokohet puna në Prokurori
Prokuroria udhëzoi kufizimin e marrjes së dëshmive, veprimeve hetimore në spitale, ambulanca dhe laboratorë mjekësorë.
Këshilli i Lartë Gjyqësor njoftoi pezullimin e punës në Gjykata për dy javët në vazhdim, si masë parandaluese ndaj koronavirusit.
Edhe Prokurori i Përgjithshëm, Olsian Çela, nxori një udhëzim ditën e djeshme, ku kërkonte nga prokuroritë që të merrnin një sërë masash, që kishin të bënin me bllokimin e disa veprimeve hetimore. Ndërsa numri i të infektuarve me COVID- 19 në vendin tonë deri mesditën e djeshme arriti në 10 dhe sipas parashikimeve të Ministrisë së Shëndetësisë, pritet që të rritet. "Këshilli i Lartë Gjyqësor, në vendimin e datës 09.03.2020 të Komitetit të Përkohshëm për Infeksionin e Përhapur nga koronavirusi i ri, në kushtet kur është deklaruar edhe mbyllja e të gjitha institucioneve arsimore në mbarë vendin, me qëllim mbrojtjen e shëndetit të popullatës nga infeksioni i shkaktuar nga COVID- 2019, vendosi: Pezullimin e veprimtarisë dhe shërbimeve gjyqësore në të gjitha gjykatat e vendit, të juridiksionit të përgjithshëm dhe të posaçëm, për shkak të situatës së krijuar nga infeksioni i përhapur COVID2019", njoftoi KLGJ- ja.
PEZULLIMI
Sipas vendimit të Këshillit të Lartë Gjyqësor, nga vendimi i pezullimit përjashtohen çështjet me natyrë të ngutshme, të vlerësuara si të tilla rast pas rasti nga gjyqtari. Më tej, në vendim thuhet se duhet të shmanget prania e publikut. "Përjashtohen nga efektet e këtij pezullimi, seancat e vlerësimit të masave të sigurisë, seancat në të cilat janë kërkuar ose zbatuar masat e sigurisë me burg dhe kur të arrestuarit, të pandehurit, ose mbrojtësit e tyre e kërkojnë shprehimisht që të vijohet me shqyrtimin e tyre. Në çdo rast, nga ana e Gjykatës duhet të shmanget prania e publikut në zhvillimin e seancave gjyqësore", shkruhet në vendimin e KLGJ- së.
PROKURORIA
"Drejtuesit e prokurorive me juridiksion të përgjithshëm, në kuadrin e situatës së krijuar nga infeksioni i shkaktuar nga COVID- 19 dhe masave të nevojshme për mbarëvajtjen dhe funksionimi e prokurorive pranë gjykatave, të vlerësojnë dhe vendosin marrjen e masave për: Kufizimin e kryerjes së veprimeve hetimore që kanë të bëjnë me marrjen e deklarimeve nga personat që kanë dijeni mbi faktet, personat nën hetim apo të pandehurit, përveç rasteve kur nga vonesa, mund të dëmtohen hetimet, ose një gjë e tillë nuk mund të shtyhet, për shkak të afateve procedurale", shkruhet në udhëzimin e Prokurorisë. Më tej, thuhet se duhet të bëhet kufizimi i veprimeve procedurale që zhvillohen në ambientet e spitaleve, ambulancave apo laboratorëve mjekësorë dhe kur nuk është e mundur, duke u pajisur në çdo rast me masat e pajisjet për mbrojtjen fizike të domosdoshme. Kufizimin e veprimtarisë administrative të zyrave të sekretarisë në çdo prokurori në kontakt me qytetarët, për të kryer komunikimet nëpërmjet shërbimit postar dhe mënyra të tjera që sigurojnë kontakte të pakta fizike. Kufizimin e orareve të takimit me qytetarët, kufizimin e mbledhjeve, analizave, takimeve ne ambientet e Prokurorisë ose zyrave të Policisë, ku ka pjesëmarrje të lartë të personave të përfshirë. Në udhëzimin e Prokurorisë thuhet gjithashtu se në seanca gjyqësore që mund të zhvillohen, prokurorët, nëse e çmojnë, të kërkojnë zhvillimin e tyre me dyer të mbyllura.