Zgjedhjet e 30 qershorit, Zguri: KQZ u bë viktimë
“Administrimi i zgjedhjeve u disbalancua, kontrolli u dobësua”
Përplasja politike në zgjedhjet lokale të 30 qershorit 2019 ndikoi drejtpërdrejt në performancën e Komisionit Qendror të Zgjedhjeve, si kolegj që administron procesin.
Efekti i parë i përplasjes politike ishte mosplotësimi i KQZ- së me 7 anëtarë, i cili mbeti vetëm me 5. Në raportimin vjetor që kreu i KQZ- së, Klement Zguri, bëri në Komisionin e Ligjeve, u shpreh se KQZ- ja u kthye në një viktimë të përplasjes politike. “Konflikti i fortë politik i vitit 2019 dhe përplasja për zgjedhjet lokale ndikuan thelbësisht në performancën e KQZ- së dhe të administratës zgjedhore. Konflikti politik i shndërroi ato zgjedhje në zgjedhje jonormale, kurse KQZ- në e çoi në kufijtë e ezaurimit. KQZ- ja nuk ishte shkaku i atij konflikti, por thjesht një nga viktimat e tij. Për shkak të tij, ne nuk funksionuam kurrë në përbërje të plotë, si organ drejtues. Për shkak të tij, administrimi i zgjedhjeve u disbalancua, kontrolli u dobësua, besimi te procesi u minua. Mbi të gjitha, për shkak të tij, konkurrenca u prish dhe votuesit nuk patën mundësi domethënëse për të zgjedhur midis ofertave politike”, tha Zguri. Më tej, teksa nënvizoi se në procesin e zgjedhjeve lokale komisionerët e përzgjedhur nuk arritën të jepnin kontributin e tyre, për shkak të mospranimit, Zguri theksoi se ky handikap solli edhe një test pozitiv, i cili ishte departizimi i komisionerëve. Zguri sqaroi se pasi nuk u pranuan anëtarët e propozuar nga PD dhe LSI për komisionerë të QZ- ve dhe KZAZ- ve, Komisioni Qendror i Zgjedhjeve i zëvendësoi ata me kandidatë nga shoqëria civile. “Zgjidhja që ofruam, ishte zgjidhje emergjence. Por ajo funksionoi. Administrimi i zgjedhjeve nuk u bllokua dhe përgjithësisht rrodhi në mënyrë të qetë e të rregullt. Ka vlerë të evidentohet ky fakt, sepse, ndonëse nga halli, zgjidhja shënon sot embrionin e një administrate jo politike, e cila përzgjidhet mbi kritere të shëndosha dhe me procedura neutrale”, tha Zguri.
FINANCIMI
Veprimtaria e Komisionit Qendror të Zgjedhjeve u përgëzua nga Komisioni i ligjeve përveç një detaji që relatori i raportit Bashkim Fino e evidentoi. Fino i kërkoi llogari Zgurit se përse në qershor i kishte shpërndarë para për
PD- në dhe LSI- në për zgjedhjet, në një kohë që ato nuk u regjistruan në zgjedhjet lokale. Fino iu referua një vendimi të muajit qershor të 2019- ës të marrë nga KQZ- ja. Por ky konstatim u rrëzua nga kryetari i KQZ- së, Klement Zguri, i cili u shpreh se dy partive të opozitës nuk iu shpërndanë para për zgjedhjeve, por vetëm fondin që alokohet çdo vit, duke llogaritur rezultatin e zgjedhjeve të fundit vendore. Sakaq, Komisioni i Ligjeve do t’i kërkojë Parlamentit që KQZ- ja të plotësojë disa detyra: Hartimi i një kodi etike. Të miratojë program pune të posaçëm për vitin në vazhdim, duke qenë se viti në vazhdim nuk është vit zgjedhor dhe duhet t’i shërbejë institucionit dhe administratës. Po ashtu, Parlamenti do t’i lërë detyrë KQZsë, që të përmbyllë bazën me të dhënat për shtetasit që në vite kanë qenë pjesë e administratës zgjedhore, si dhe të zbatojë në praktikë rregullat e miratuara të kontrollit dhe verifikimit të shpenzimeve të financimeve të partive politike dhe fushatave elektorale.