Presion ekstrem nga SHBA për taksën: Do të tërheqim Ushtrinë nga Kosova
Kurti: “S’besoj se KFOR do largohet, është thjesht dëshirë e djalit të Trump”. Thaçi: “S’mund të rrezikojmë me SHBA për një grusht votash”
SHBA ka bërë paralajmërimin më të drejtpërdrejtë për ndëshkimin e Kosovës, në rast se qeveria Kurti nuk iu bindet plotësisht kërkesave të saj për heqjen pa kushte të taksës ndaj Serbisë.
Qeveria Kurti ka rënë dakord për heqjen e taksës, por ka kërkuar si kusht ndaljen e fushatës së Serbisë kundër njohjeve të pavarësisë së Kosovës, duke ofruar edhe reciprocitet. Por SHBA nuk po e pret mirë mosbindjen e Kurtit. Senatori amerikan republikan David Perdue ka shkruar në “Twitter” se në rast që Kosova nuk e shfuqizon tarifën ndaj Serbisë dhe nuk është e përkushtuar për paqen, atëherë SHBA- ja duhet të rishqyrtojë praninë e saj në Kosovë. “Për më shumë se dy dekada, forcat amerikane kanë ndihmuar në ruajtjen e paqes mes Kosovës dhe Serbisë. Tani, me përparimin e bërë historik, Kosova duhet të bëjë pjesën e vet dhe të shfuqizojë të gjitha tarifat e vendosura ndaj Serbisë. Nëse Kosova nuk është plotësisht e përkushtuar për paqe, atëherë SHBA duhet të rishqyrtojë praninë e saj atje”, ka shkruar Perdue. Mesazhi i tij është shpërndarë nga emisari i bisedimeve Kosovë- Serbi për SHBA, Richard Grenell. Po ashtu, edhe djali i madh i Presidentit Trump, Donald Trump Junior, ka shkruar se “është koha që t’i kthejmë trupat në shtëpi”. Deklarata e senatorit Perdue u mbështet edhe nga llogaria zyrtare në “Twitter” e Këshillit për Siguri Kombëtare në SHBA. REAGIMI I KURTIT “SHBA- të i kemi aleatë e partnerë të pazëvendësueshëm në aspektin politik, ekonomik, gjeopolitik, kulturor, ushtarak e të tjera. Natyrisht që zyrtarë të ndryshëm mund të kenë diferenca, por nuk besoj se këto diferenca do të mund të shndërrohen në kundërthënie apo antagonizma të papajtueshëm. Besoj fuqishëm që Republika e Kosovës dhe SHBA- ja apo kombi shqiptar dhe SHBA- ja i duhen shumë gjatë njëra- tjetrës”, tha Kurti. Ai shtoi se nuk ka informata në lidhje me anulimin e disa projekteve për Kosovën në vlerë prej dhjetëra miliona eurosh. Sa për taksën, Kurti tha se i duhet edhe pak kohë që vendimi në qeveri të jetë me vota unanime. Po ashtu, ai nuk beson në largimin e KFOR. “Besoj se nuk do të tërhiqet nga Kosova. Kemi parë një si dëshirë të djalit të Presidentit të SHBA, mirëpo kjo nuk ka lidhje me tarifën 100 për qind. Nëse ajo dëshirë bëhet edhe vendim i Presidentit amerikan, sërish nuk ka lidhje me tarifën 100 për qind. Ka të bëjë me një reduktim të trupave që SHBA e ka bërë edhe në Afganistan, edhe në Siri”, ka deklaruar Kurti. “Por, po them, unë besoj se Shtetet e Bashkuara të Amerikës duhet të qëndrojnë në të gjitha format e tyre shtetërore në Kosovë me ambasadë, me ekonomi, me kulturë, me mbrojtje dhe jemi për partneritet dhe aleancë të fuqishme. Ne do ta heqim tarifën 100 për qind në mënyrë graduale, duke e zëvendësuar me reciprocitetin gradual. Jemi të bindur se kjo është rruga e duhur përpara dhe qëndrimi më racional dhe më i dobishëm për vendin tonë”, deklaroi Kurti, i cili nuk ka ndryshuar qëndrimin e mëparshëm, për të cilin nuk ra dakord SHBA: heqje graduale të taksës me kusht reciprociteti, ndërkohë që SHBA kërkon heqje të taksës pa kushte. PARALAJMËRIMI I
THAÇIT Presidenti i Kosovës, Hashim Thaçi, ka kërkuar që qeveria e Kosovës, urgjentisht të marrë vendime në përputhje me kërkesat e SHBA- së. “Mjaft e keni cenuar lidhjen tonë speciale me SHBA- në, pa të cilën nuk do ta kishim as lirinë, as shtetin dhe as të ardhmen. Me këtë qasje po vihet në pikëpyetje edhe vetë e ardhmja e shtetit tonë”, ka shkruar Thaçi. Në një konferencë për media, ai shtoi: “Unë mendoj dhe kam besim të plotë që relacioni me SHBA- në nuk do të mbetet pre e tekave apo aspiratave të një politike të ngurtë dhe elektorale ditore, por do të kemi një fokus të vendimmarrjeve të shpejta, të qarta të kultivimit dhe forcimit të partneritetit strategjik me SHBA. Ne, të gjithë liderët politik të Kosovës, jemi të zëvendësueshëm. Partneriteti strategjik, i përjetshëm dhe i veçantë me SHBA- në është i përjetshëm. Ai është vullneti i qytetarëve të Kosovës dhe ky vullnet duhet të zbatohet nga të gjithë liderët politikë të Kosovës dhe jo që raporti me SHBA- në të cenohet, për shkak të një grushti të votave”, tha Thaçi. QËNDRIMI I MUSTAFËS
Kryetari i LDK- së, Isa Mustafa, ka këmbëngulur në heqjen pakusht të taksës. Sipas tij, marrëdhëniet me SHBA- në kanë hyrë në një fazë shumë delikate, por edhe kritike. “Deklarata e Senatorit Perdue flet qartë se ku jemi. S’ka tarifë, as reciprocitet që vë në peshore marrëdhëniet me aleatin tonë kryesor. Si kryetar i LDK- së, jam deklaruar qartë për heqjen e pakusht të tarifës, ndërkaq që reciprociteti të dakordohet me SHBA dhe BE, varësisht nga sjellja e Serbisë. Ky është qëndrimi dhe zëri i LDK- së. Konsideroj se nuk ka zë të popullit në Kosovë që rrezikon dhe i vë në pikëpyetje relacionet me SHBA... E kam dërguar një zyrtar të lartë të LDK- së të bisedojë drejtpërdrejti me Grenell, të informohet për takimin e fundit të Presidentit Thaçi dhe Vuçiç në Uashington dhe t’ia prezantojë qëndrimet e LDK- së”, shkroi ai. Mustafa ka paralajmëruar se do të bashkëbisedojë me Kryeministrin Kurti, si partner i koalicionit, dhe si LDK, e do të bëjë të qarta veprimet që ruajnë partneritetin dhe miqësinë me SHBA- të.