Meta dekreton tre gjyqtarët e lartë, SHBA: Mirëpresim emërimet
Ambasadorja e SHBA: Mirëpresim emërimet nga Presidenti
BLEONA METUSHI Institucioni i Presidentit njoftoi dje se pas shqyrtimit të kandidaturave për tri vende në Gjykatën e Lartë, vendosi të dekretojë Sokol Sadushin, Ervin Pupen dhe Ilir Pandën si gjyqtarë.
Në këtë mënyrë, numri i gjyqtarëve në këtë Gjykatë shkon në 4, së bashku me Ardian Dvoranin. Duke iu referuar njoftimit të Presidencës, dekretimi është kryer pas marrjes së informacionit shtesë nga Këshilli i Lartë Gjyqësor në lidhje me kandidatët. "Pasi siguroi një informacion shtesë prej Këshillit të Lartë Gjyqësor mbi këto propozime, sot, në datë 11.03.2020, brenda afatit që përcakton neni 136 i Kushtetutës, Presidenti i Republikës ka vendosur; Dekretimin për emërimin si gjyqtar të Gjykatës së Lartë, nga radhët e juristëve të spikatur, të kandidaturave të propozuara të: Zotit Sokol Sadushaj; Zotit Ervin Pupe dhe Zotit Ilir Panda. Presidenti i Republikës, Ilir Meta, vlerësoi pa vonesë këto propozime, duke konsideruar se fillimi nga funksionimi i Gjykatës së Lartë është një element kyç për respektimin e të drejtave kushtetuese të qytetarëve për një gjykim të drejtë, nga një gjykatë e caktuar me ligj dhe brenda një afati të arsyeshëm", njoftoi dje Presidenca.
AMBASADA E SHBA
Pak orë pas dekretimit të 3 anëtarëve të rinj të Gjykatës Kushtetuese, reagoi edhe ambasadorja e Shteteve të Bashkuara të Amerikës, Yuri Kim, e cila shkruante në "Twitter" që mirëpriste emërimin dhe se tashmë duhet të mbështeteshin gjyqtarët "që të shërbejnë drejtësi". "Ne e mirëpresim emërimin e tre anëtarëve të rinj të Gjykatës së Lartë nga Presidenti Ilir Meta, ky është një hap i rëndësishëm dhe pozitiv që duhet të vazhdohet deri në fund. Tani, ne duhet të mbështesim gjyqtarët në mënyrë që ata të mund të shërbejnë drejtësi për të gjithë njerëzit e Shqipërisë", shkruante ambasadorja amerikane, Yuri Kim.
NISJA E PUNËS DHE KANDIDATËT
Duke iu referuar parashikimeve ligjore, 3 kandidatët e rinj do të fillojnë punë pas 15 ditësh. Sokol Sadushaj aktualisht është drejtor i Shkollës së Magjistraturës dhe kërkon që të jetë pjesë e Gjykatës së Lartë në fushën e së drejtës administrative. Sadushi e ka nisur detyrën si prokuror në vitin 1986 në Prokurorinë e Vlorës, ndërsa ndër vite ka punuar si pedagog dhe ka qenë pjesë e Gjykatës Kushtetuese. Ilir Panda ka përfunduar studimet në vitin 1986 dhe gjatë viteve ka qenë pedagog, avokat, specialist në institucionet e drejtësisë si dhe ministër i Drejtësisë. Ervin Pupe është kandidati i tretë, i cili është pedagog në Universitetin e Tiranës për të drejtën civile. Gjykata e Lartë, duhet të ketë 19 anëtarë, të emëruar në detyrë me dekret të Presidentit të Republikës dhe propozuar nga Këshilli i Lartë Gjyqësor. Disa ditë më parë, KLGJ nisi procedurat për përzgjedhjen e kandidatit të katërt për këtë Gjykatë, e cila ka një ngarkesë prej më shumë se 35 mijë dosjesh në pritje të shqyrtimit.