Mjeku në Itali: Ilaçi kundër artritit rezultat te të infektuarit
Edhe pse për më shumë se 3 muaj vijojnë kërkimet për gjetjen e ilaçit që do të luftojë COVID- 19, ende nuk ka asnjë sinjal. Megjithatë, duket se shpresat nuk janë shuar plotësisht. Një mjek nga Spitali i Napolit, Paolo Ascierto, ka sugjeruar futjen në listën e medikamenteve për trajtimin e koronavirusit të një ilaçi të quajtur “Tocilizumab”, i cili përdoret për kurimin e artritit te pacientët. Sipas mediave vendase, mjeku ka thënë se ai ka trajtuar dy pacientë me të dhe brenda 24 orëve, terapia ka treguar rezultate të shkëlqyera. “Dy pacientët e parë u trajtuan në Itali dhe brenda 24 orësh, terapia tregoi rezultate të shkëlqyera. Nesër, një nga 2 pacientët do të lërë spitalin, sepse gjendja e tij është përmirësuar. Dje filloi trajtimi për dy persona të tjerë dhe sot do të merremi me dy të tjerë. Sa i përket pacientit të dytë të trajtuar, ka pasur një përmirësim dhe tani është i qëndrueshëm. Këtu në Napoli kemi për qëllim të trajtojmë sa më shumë pacientë të jetë e mundur. Një protokoll kombëtar është i nevojshëm menjëherë, për të zgjeruar përdorimin e tocilizumab në pacientët e infektuar me koronavirus dhe në kushte shumë kritike”. Mbetet për t’u parë efikasiteti që do të ketë ky medikament në mposhtjen e COVID- 19. Nëse vërtet arrihen rezultate, atëherë nuk do të ishte utopike të mendohej se “fitorja” ishte duke trokitur. Në këtë situatë të krijuar nga koronavirusi, mjekët, në mënyrë të vazhdueshme, kanë apeluar që të mos neglizhohet marrja e vitaminave, ndër më të rëndësishme vitamina C dhe D. Është e rëndësishme që sistemi imunitar të jetë i përgatitur për të përballur çdo infeksion apo situatë gripale.