Mjekët hyjnë në karantinë pas kontaktit me viktimën
Manastirliu: Bëmë analizat e mjekëve të spitalit, dolën të pastër
Stafi mjekësor që i ka shërbyer 73- vjecares së prekur me koronavirus është vetëkarantinuar nëpër shtëpi, pas konfirmimit me COVID19 të 73- vjeçares Xh. G.
Dyshohet që ata të jenë të infektuar me CONVID- 19, ndaj edhe kanë kryer analizat përkatëse. Mësohet se 73vjecarja ka qëndruar disa ditë në repartin e Patologjisë, ku është mbajtur në terapi intensive nga bluzat e bardha. Stafi mjekësor, duke mos e ditur se gruaja ishte prekur me koronavirus, nuk kishin marrë masa parandaluese, duke shërbyer si për çdo pacient tjetër. "Kemi urdhëruar të gjithë personat që kanë pasur kontakt me shtetasen Xh. G., e cila ndërroi jetë pasi ishte prekur nga koronavirusi, që të kryejnë analizat përkatëse dhe të vetëkarantinohen në shtëpitë e tyre për të paktën 14 ditë", thanë burime nga Spitali i Durrësit, të cilat shtuan se nuk bëhet fjalë vetëm për stafin mjekësor, por edhe persona të tjerë. E infektuara mësohet se ka pasur kontakt direkt me 16 infermierë, 23 mjekë dhe 6 sanitarë të Repartit të Patologjisë, të cilët dje nuk janë paraqitur në punë, nga frika se mund të jenë prekur nga virusi vdekjeprurës. Të gjithë këtyre punonjësve të spitalit iu janë marrë mostrat, u kryen analizat për koronavirus pranë Institutit të Shëndetit Publik. Gjithashtu, e moshuara fillimisht mësohet se ka qëndruar për disa orë në Urgjencë, ku ka bërë vizitat dhe më pas i janë bërë letrat për shtrim.
REZULTATET PËR MJEKËT
50 mjekë dhe infermierë të
Spitalit të Durrësit rezultuan negativë në testin për COVID- 19. Mostrat e tyre u morën pas vdekjes së 73- vjeçares nga koronavirusi, e cila për ditë me radhë nuk kishte treguar se kishte ardhur nga Italia. Ka qenë vet ministrja e Shëndetësisë, Ogerta Manastirliu, ajo që ka bërë të ditur këtë lajm. "Dua të njoftoj se të gjitha testimet, e mjekëve dhe infermierëve kanë rezultuar negative. Kjo do të thotë se mjekët dhe infermierët kanë punuar me udhëzimet e MSH dhe të OBSH- së", tha Manastirliu.
INFERMIERËT
Pasi ministrja e Shëndetësisë, Ogerta Manstirliu deklaroi se rezultatet e një reparti të Spitalit të Durrësit, ku ishte e shtruar 73- vjeçarja që vdiq dje nga koronavirusi dolën negative, reagoi dhe personeli i këtij institucioni. Në një komunikim për media, disa prej infermiereve që ndodhen në karantinë, kanë deklaruar se ka qenë drejtoresha e spitalit ajo që i ka marrë në telefon dhe i ka dhënë lajmin e mirë. Ndërkohë, një prej infermiereve kërkoi që të njihej me përgjigjen e analizave personalisht. Ndërsa një tjetër shtroi pyetjen për faktin se pse duhet të rrinë në karantinë për 14 ditë. "Na mori drejtoresha, na tha që nuk ka asnjë të infektuar, por analizat janë bërë individuale. Përgjigjet i duam individuale, të na i nisin t'i shohim. Drejtoresha na tha që do të qëndrojmë për 14 ditë në karantinë. Nuk do të shkojmë në punë. Pse kur nuk jemi të infektuar, duhet të qëndrojmë në karantinë për 14 ditë si repart? Kemi frikë për fëmijët, për jetën. Që prej ditës së djeshme, jemi ngujuar dhe na thanë që duhet të bëjmë analiza shtesë se mos brenda 14 ditësh mund të shfaqet", tha njëra prej infermiereve.