E dyshuar me koronavirus, infermierja rezulton negative
Pronari i supermarketit në Përmet mbyll qepenat, erdhi nga Italia pak ditë më parë. Vetëkarantinohet në shtëpi bashkë me familjen
BRIKENA META COVID– 19 ka përfshirë edhe jugun e Shqipërisë. Dy raste të dyshuara janë konstatuar në zonën e Përmetit. Rasti i cilësuar si më i rëndë, ai i një infermiereje nga Ballabani i Këlcyrës rezultoi negativ pas analizave të bëra.
57– vjeçarja Ë. C., ishte e shtruar në patologjinë e Spitalit Rajonal të Gjirokastrës prej datës 6 mars. Ajo është paraqitur në spital me shenjat e gripit, kollë, temperaturë dhe insuficiencë pulmonare. Mjekët e kanë trajtuar për rreth një javë, ndërkohë që paraditen e së mërkurës ajo është regjistruar si e dyshuar me virusin COVID– 19. Pacientja tregoi se ditë më parë kishte takuar disa të afërm të ardhur nga Italia. Shenjat e paqëndrueshmërisë së shëndetit i janë shfaqur më shumë se 10 ditë më parë. Ajo është mjekuar në mënyrë individuale, ndërsa pas përkeqësimit të shëndetit u shtrua në Spitalin e Gjirokastrës, ku mjekët nuk kanë konstatuar fillimisht shenja të koronavirusit. Pas rezultateve të analizave, ky rast rezultoi negativ.
SHENJAT Me shenja të gripit janë edhe familjarët e 57- vjeçares në shtëpinë e saj në Ballaban, ndërsa pas dyshimeve për koronavirus mjekët detyruan me vetizolim familjen e motrës së infermieres dhe të vajzës së saj, që ndodhen në Gjirokastër. Pas mesditës së të mërkurës është nisur drejt Tiranës edhe tamponi me mostrën e infermieres së dyshuar me virusin vdekjeprurës, ndërsa përgjigjja e analizave doli gjatë orëve të vona të së mërkurës. Drejtoria e ISHSH Gjirokastër gjithashtu, nisi marrjen e masave në terren për parandalimin e përhapjes së sëmundjes. Në të gjithë qarkun janë mbyllur disa lokale, bare, restorante, palestra, pika playstation, ndërsa për ambientet e mëdha është detyruar respektimi i hapësirës 2 metra nga njëra tavolinë te tjetra.
MASAT Në kuadër të këtyre masave, një tregtar në qytetin e Përmetit është vetizoluar në karantinë shtëpiake së bashku me pjesëtarët e familjes së tij. S. P. 49 vjeç, nga qyteti i Përmetit, kishte ardhur përmes aeroportit të Rinasit nga Italia dhe për këtë arsye, me sugjerimin e drejtorit të ISHSH- së Gjirokastër, Edi Sinoimeri, dhe të Policisë së Përmetit, u vetëkarantinua në ambientet e shtëpisë së bashku me katër pjesëtarët e tjerë të familjes. Ai ka ulur qepenat e supermarketit të tij në qytetin e Përmetit për të parandaluar çdo rrezik të mundshëm kundrejt klientëve të tij. Tregtari përmetar nuk ka pasur shenja për koronavirus, ndërsa këtë masë e ka marrë pas njoftimit të qeverisë se do të gjobiteshin personat që kanë ardhur nga vendet e prekura dhe që nuk vetëkarantinohen.
SPITALI Spitali i Gjirokastrës ka marrë masat e nevojshme për rastet me COVID– 19. Dy dhoma në pavijonin e Infektivit janë transformuar në karantinë, ndërsa mjekët dhe infermierët përdorin masat e nevojshme mbrojtëse. Probleme janë paraqitur me personat, të cilët kanë familjarë të shtruar në spital. Shumica prej tyre këmbëngulin të hyjnë brenda ambienteve të spitalit, pavarësisht urdhrit të dhënë nga drejtoria e këtij institucioni për moslejimin e qytetarëve që vijnë nga ambientet jashtë tij. Përgjatë këtyre ditëve, situata në
Gjirokastër ka qenë në dukje e qetë. Rrugët, baret e lokalet e qytetit janë të mbushura si në një situatë të zakonshme, ndonëse nuk kanë munguar raportimet e pavërteta për raste të prekura në qytet.