Në Shkodër asnjë i prekur, kërkojnë kontroll në spital
Spitali i Shkodrës dezinfekton të gjitha ambientet e brendshme
Qytetarët në Shkodër ndihen të frikësuar nga përhapja e koronavirusit që ka prekur zyrtarisht edhe Shqipërinë me 15 raste të konfirmuara si pozitive deri më tani. Një pjesë e qytetarëve shkodranë, kryesisht ata që kanë ardhur këto kohë nga shtetet jashtë Shqipërisë, kanë shkuar në spital për t’u kontrolluar në rast se janë të prekur me koronavirus. Edhe pse pa asnjë simptomë, numri i tyre që janë kontrolluar është i lartë. Ndërkohë, nga gjithë këto raste që deri më tani kanë rezultuar negative dhe pjesa më e madhe me gripin normal, vetëm dy analiza janë dërguar mbrëmjen e 10 marsit drejt Tiranës dhe dy raste të tjera pasditen e 11 marsit. Nga përgjigjet e ardhura rezulton se asnjë prej tyre nuk janë të prekur nga koronavirusi. Ashtu si në të gjithë Shqipërinë, edhe në Shkodër kanë nisur që të merren disa masa parandaluese ndaj COVID- 19. Kështu, Spitali Rajonal i Shkodrës ka nisur dezinfektimin e të gjitha mjediseve të brendshme. Nëse deri më tani është dezinfektuar më shumë vetëm reparti infektiv, tashmë ka nisur dezinfektimi i të gjitha mjediseve që do të përmbyllet në 12 mars. Po ashtu, në bashkëpunim me ndërmarrjen e Ujësjellës
Kanalizimeve do të dezinfektohen edhe mjediset e jashtme të Spitalit Rajonal të Shkodrës. Ndërkohë, këto nuk janë të vetmet masa. Bashkia Shkodër, që herët në mëngjesin e 11 marsit, pasi ka dezinfektuar godinat e shkollave dhe kopshteve, tashmë ka nisur dezinfektimin e mjediseve publike, ku ka një densitet të lartë lëvizjeje. Kështu, ka nisur me dy pedonalet në qendër të qytetit për të vazhduar më pas edhe lulishtet kryesore të Shkodrës, ndërkohë që aksioni pritet të zgjerohet edhe në disa prej rrugëve ku qarkullimi është i madh gjatë ditës. Një problem janë autobusët e transportit urban, në të cilët edhe pse vetë shoferët shprehen se ka rënë lëvizja e qytetarëve, ende nuk janë dezinfektuar dhe ky është një proces që duhet të kryhet me çdo kusht si një urdhër edhe i qeverisë dhe Ministrisë së Shëndetësisë. S. N