Venecia kritika për vetingun, gjyqtarët: Rekomandimet të pasqyrohen në raportin final
Komisioni rekomandon që procesi të ecë më shpejt dhe afatet kohore për të siguruar dokumentacion nga subjektet të rishikohen
BLEONA METUSHI Unioni i Gjyqtarëve të Shqipërisë dhe Shoqata Kombëtare e Gjyqtarëve, me anë të një deklarate për mediat, tha se përshëndesnin gjetjet e Komisionit të Venecias në lidhje me procesin e vetingut.
Kujtojmë se në draft- opinion, Komisioni, teksa konsideronte të rëndësishme Reformën në Drejtësi, vinte në dukje nëse rregullat e përdorura deri më tani në procesin e vetingut, jepnin zgjidhjet më të mira apo jo. "Unioni i Gjyqtarëve të Shqipërisë ( UGJSH) dhe Shoqata Kombëtare e Gjyqtarëve të Shqipërisë ( SHKGJSH) kanë ndjekur me vëmendje pasqyrimin e bërë ditët e fundit nga programi në gjuhën shqipe i radios "Zëri i Amerikës", të draftopinionit nr. CDL ( 2002) 011, datë. 06.03.2019 të përpiluar nga Komisioni i Venecias, sa i përket procesit të vetingut që po zhvillohet aktualisht në Shqipëri. UGJSH dhe SHKGJSH përshëndesin gjetjet e Komisionit të Venecias sa i përket procesit të vetingut ( shkronja D, pika 37, 38, 39, 40, 41, 42 dhe 43), i cili, pavarësisht domosdoshmërisë dhe nevojës për pastrimin e sistemit gjyqësor nga paaftësia dhe korrupsioni, gjithsesi solli pasoja të paparashikueshme, jo vetëm për Gjykatën Kushtetuese dhe Gjykatën e Lartë, por edhe për gjithë sistemin gjyqësor dhe funksionimin e shtetit të së drejtës dhe sundimin e ligjit në Shqipëri", shkruhet në reagim.
PASQYRIMI
Në deklaratën e përbashkët, gjyqtarët thonë se shpresojnë që këto gjetje të pasqyrohen edhe në raportin final të Komisionit. Kjo, thonë ata, do të ishte mënyra më e mirë që procesi të garantojë të drejtat dhe liritë themelore, duke i renditur ato. "Shoqatat e Gjyqtarëve Shqiptarë inkurajon me forcë Komisionin e Venecias, që rekomandimet e bëra në pikën 111 të këtij draft- opinioni të pasqyrohen edhe më gjerë në opinionin përfundimtar të këtij Komisioni. UGJSH dhe SHKGJSH janë të bindura se integriteti i lartë moral e profesional i anëtarëve të Komisionit të Venecias do të garantojë pasqyrimin e këtyre rekomandimeve edhe në versionin përfundimtar të këtij opinioni, me paanësi dhe pavarësi të plotë nga palët e përfshira në këtë raport. Gjyqtarët shqiptarë janë të bindur se vetëm zbatimi i këtyre rekomandimeve gjatë procesit të vetingut, të sugjeruara nga
Komisioni i Venecias, do të garantojë në përputhje me ligjin, Kushtetutën e Republikës së Shqipërisë dhe Konventën Europiane të të Drejtave të Njeriut: zbatimin e të drejtave dhe lirive themelore të individit; parimin e prezumimit të pafajësisë; parimin e së drejtës për një mbrojtje efektive në kohë dhe në hapësirë; parimin e zhvillimit të një procesi të rregullt ligjor; parimin e sigurisë juridike; mbrojtjen e jetës personale dhe familjare të magjistratëve dhe barazinë para ligjit të të gjithë magjistratëve dhe atyre që aspirojnë për t'u bërë magjistratë në shkallët më të larta të sistemit gjyqësor", shkruhet në reagimin e përbashkët.
KOMISIONI I VENECIAS
Duke iu referuar materialit të publikuar nga "Zëri i Amerikës", Komisioni i Venecias shkruan se "Zbatimi i procesit të vetingut të gjyqtarëve dhe prokurorëve krijon hapësirë për manipulime politike. Disa persona nuk e kaluan vetingun sepse bashkëshorti i tyre nuk mund të shpjegonte disa të ardhura të fituara shumë kohë para se të martoheshin. Ka një zbatim tepër të ngurtë të afateve procedurale. Dokumentacioni duhet të sigurohet rreptësisht brenda një afati prej dy javësh, gjë që ndonjëherë nuk është e mundur, veçanërisht kur dokumentet e certifikuara duhet të merren nga jashtë. Komisioni i Venecias rekomandon që të rivlerësohen modalitetet aktuale të procesit të vetingut, përfshirë fushën e veprimit të tij dhe zbatimin e rregullave procedurale siç janë afatet në një mënyrë më pak të ngurtë. Vetingu duhet të aplikohet në një mënyrë koherente", shkruan Komisioni i Venecias.