Mbi 170 subjekte kanë dalë para vetingut

Rreth 170 subjekte rivlerësimi kanë kaluar në sitën e Komisionit të Pavarur të Kualifikimit që nga seanca e parë që ka zhvilluar ky institucion. Prokurorë, gjyqtarë dhe këshilltarë ligjorë janë përballur me hetimin e trefishtë të KPK, ku një pjesë e konsiderueshme e tyre nuk kanë arritur të konfirmohen në detyrë. Kur kanë kaluar rreth 1 vit e gjysmë nga nisje e procesit të vetingut, janë kontrolluar në tri kriteret, pasurinë, pastërtinë e figurës dhe aftësitë profesionale rreth 170 subjekte, prej të cilëve 72 prokurorë e gjyqtarë që janë konfirmuar për të vazhduar më tej. 58 subjekte nuk kanë arritur të marrin dritën jeshile dhe janë konsideruar të papërshtatshëm për të dhënë drejtësi. Ndërkohë, procesi është ndërprerë për disa të tjerë, të cilët kanë dhënë dorëheqjen ose kanë dalë në pension.