Erdhën me anije dhe avion, zbulohen 4 “pacientë zero”, qeveria mbyll kafenetë e urbanët, Ushtria në rrugë
Basha kërkon të nisin ndihmat financiare për qytetarët dhe biznesin, Rama: Po mendojmë për kreditë
ADA HAZIZOLLI
Koronavirusi ka arritur të tejkalojë çdo kufi, duke “e ngjyrosur” botën me të kuqe në vetëm 3 muaj.
Nisur nga situata e krijuar, ku janë raportuar më shumë se 122 mijë të infektuar dhe mbi 4400 persona, të cilët kanë ndërruar jetë, Organizata Botërore e Shëndetësisë ka shpallur dje koronavirusin pandemi. Kreu i OBSH- së iu bëri apel vendeve që të marrin masa urgjente për të izoluar virusin. “Ne vlerësojmë se COVID- 19 mund të karakterizohet si një pandemi. U bëj thirrje të gjithëve që të marrin masa urgjente dhe agresive që nga dita e parë. I kemi rënë kambanës së alarmit shumë fort dhe shumë qartë”, tha drejtori i përgjithshëm i OBSH- së, Tedros Adhanom Ghebreyesus, në një konferencë për shtyp në Gjenevë. Por çfarë nënkupton pandemia? Sipas Organizatës Botërore të Shëndetësisë, koronavirusi është një sëmundje e re që është përhapur globalisht. Duke qenë se shumica e njerëzve nuk janë imun ndaj kësaj sëmundjeje, ajo mund të përhapet përtej parashikimit. Pra, më shumë sesa për ashpërsinë e sëmundjes, pandemia është e lidhur me shtrirjen e saj gjeografike. Kujtojmë që në 2009, OBSH shpalli gjendjen e pandemisë edhe për situatën e krijuar asokohe nga gripi i derrit H1N1.
SITUATA Ndonëse jo gjithmonë pranohet me zë të lartë, për shumëkënd prej nesh, koronavirusi ka gjunjëzuar botën. Kjo për shkak të përhapjes së shpejt. Pas Kinës, e cila ka raportuar mbi 88 mijë të infektuar, situata e rënduar paraqitet edhe në Itali. Ndërsa masat e marra në Kinë kanë ndihmuar në ndalimin e përhapjes së sëmundjes dhe kanë shmangur një numër të konsiderueshëm rastesh, e njëjta gjë s’mund të thuhet për Italinë fqinje, ku shifrat e të infektuarve njohin rritje ditë pas dite. Deri në orët e mbrëmjes së djeshme, mediat vendase kanë raportuar për mbi 10 500 të infektuar nga koronavirusi, ndërkohë që numri i viktimave ka shkuar në 830.
MOSHAT COVID- 19 është një virus që transmetohet nga njeriu te njeriu, por kjo ndodh nga kontakti i ngushtë, nga teshtitja ose kollitja. Nuk është një virus që përhapet përmes ajrit. Ajo çka prek, është sistemi i frymëmarrjes, duke dhënë një krizë të rëndë akute të frymëmarrjes. Simptomat me të cilat shfaqet janë të njëjta me ato të një gripi normal, ethe, nganjëherë diarre, dhimbje të fytit, vështirësi në frymëmarrje. Sipas Organizatës Botërore e Shëndetësisë mosha e pacientëve të infektuar nga koronavirusi është midis 49 dhe 56 vjeç. OBSH- ja konfirmon po ashtu se numri i fëmijëve të infektuar është i ulët. Sa u takon rasteve fatale, vdekshmëria prek 80% të njerëzve mbi 60 vjeç, të cilët vuajnë nga sëmundjet kronike. Shkencëtarët kanë vlerësuar se çdo person i infektuar mund ta përhapë atë diku midis 1.5 dhe 3.5 personave pa masa efektive të kontrollit. Ndërkohë që koha minimale e shpërndarjes së infeksionit është 15 minuta.