Basha: Të pezullohen faturat e ujit dhe energjisë, mbështetje për sektorin e turizmit e fason

Kryetari i PD: Të rishikohet menjëherë buxheti për vitin 2020, të alokohen fondet e nevojshme për trajtimin e të sëmurëve

Paralel me masat shtesë të qeverisë për të ulur mundësitë e shpërhapjes së koronavirusit COVID19, kryetari i Partisë Demokratike, Lulzim Basha, rekomandoi që të konsiderohet dëmi ekonomik dhe social që po shkakton virusi.

Në një konferencë për shtyp ditën e djeshme, kryetari i selisë blu, Lulzim Basha, propozoi 6 masa, të cilat, sipas tij, ndihmojnë biznesin për të kaluar vështirësitë financiare. Për bizneset në kryeqytet dhe në Durrës, kryetari i selisë blu kërkon që qeveria të pezullojë tatimfitimin nga 6 deri në 12 muaj, ndërsa siguracionet shëndetësore dhe shoqërore të bëhen me këste për një periudhë 12- mujore. Por këto nuk ishin të vetmet. “Pezullimin dhe fshirjen e pagesave të faturave të energjisë dhe të ujit për të gjithë konsumatorët ( familjarë dhe biznese) në zonat ( bashkitë) ku virusi COVID- 19 është shfaqur. Gjithashtu, të ndalohet shkëputja e furnizimit me ujë dhe energji elektrike në rast të mospagesës së detyrimeve për periudhat pararendëse deri në tejkalimin e kësaj gjendje. Përjashtim nga taksa e pronës dhe nga të gjitha taksat dhe tarifat vendore për një periudhë 3- mujore në zonat ( bashkitë) ku virusi Covid- 19 është shfaqur. Përjashtim nga kamatëvonesat dhe gjobat për një periudhë 3- mujore. Mbështetje me fokus të veçantë për sektorët prioritare dhe sektorët me vulnerabël, siç janë; sektori i turizmit apo sektori fason apo call center, të cilët kanë pësuar apo pritet të pësojnë një rënie drastike nga koronavirusi dhe disa prej tyre janë goditur tashmë rëndë edhe nga tërmeti i 26 nëntorit 2019”, tha kryedemokrati Basha. RISHIKIMI I BUXHETIT

120 njësitë që janë në gatishmëri momentalisht për të shtruar pacientët, të cilët janë të infektuar nga koronavirusi, sipas kryedemokratitm nuk janë të mjaftueshëm. Në këtë aspekt, Basha kërkoi nga qeveria që të rishohë menjëherë buxhetin për vitin 2020 dhe të alokojë më shumë fonde për përballimin e të gjithë situatës. Kjo është një kërkesë e përsëritur e opozitës, pasi më herët e ka bërë një kërkesë të tillë edhe pas tërmetit, që qeveria rishihte pagesat e parashikuara për koncesionet për të përballuar situatat. “Nevojitet rishikimi i menjëhershëm i buxhetit të vitit 2020, me qëllim alokimin e fondeve të nevojshme në përballimin e kostove për trajtimin e të sëmurëve, numri i të cilëve është rritur që nga momenti i zbulimit të pacientëve të parë dhe pritet të rritet dita- ditës”, tha Basha. MASAT PËR MJEKËT Po ashtu, gjatë fjalës së tij, kryetari i PD- së, Lulzim Basha, akuzoi qeverinë se më shumë bën plane se si të mbushë ditën me propagandë në ekrane sesa të marrë masa konkrete për sigurimin e mjekëve dhe infermierëve, që janë në vijë të parë të kontaktit me pacientët e infektuar. Referuar rastit të Durrësit, ku dje u shënua viktima e parë dhe 4 mjekë u vetëkarantinuan, Basha ngriti shqetësimin se mjekët nuk kanë të gjitha pajisjet e specializuara. “Shqetësimi më i madh është se shumica dërrmuese e personelit shëndetësor në qendra shëndetësore nuk kanë mjetet e duhura mbrojtëse. Përgjegjësinë nuk e kanë mjekët. Ata janë heronjtë. I kemi parë me sytë tanë sesi përballojnë flukse prej 60 pacientësh pa asnjë masë mbrojtëse. Nuk mund të mjaftohemi duke u thurur vargje heroizmi mjekëve. Duhet t’i pajisim urgjentisht. Kjo kërkon vënien në dispozicion të fondeve të mjaftueshme. Fondet aktuale janë totalisht të pamjaftueshme. Nuk është koha për propagandë. Nuk është koha për larje duarsh në televizion, kur gjysma e popullit nuk ka ujë të rrjedhshëm. Kjo është shfaqje, është tallje”, tha Basha. Më tej, kryetari i selisë blu i bëri thirrje Kryeministrit Rama, që t’i vërë në dispozicion stafit mjekësor pajisjet më të fundit teknologjike, të cilat nxjerrin rezultatet e testeve të pacientëve në një kohë më të shkurtër se aktualisht. Nëse për momentin, për të marrë përgjigjen e një analize duhen 3 orë, sipas kryedemokratit, pajisjet e reja e bëjnë për 45 minuta.