Emrat e ISSH, 1264 pensionistët në Tiranë dhe rrethe që përfitojnë shtesën e re
LISTA ME MINATORET, METALURGET E NAFTETARET QE MARRIN PENSION DERI 20 PER QIND ME TE LARTE
Edhe pse Shqipëria ka qenë në karantinë, për shkak të virusit, gjatë 35 ditëve të fundit, ISSH ka miratuar dy lista të reja me llogaritjen e shtesës së pensionit për 1264 përfitues.
Gazeta zbardh emrat e minatorëve, naftëtarëve dhe metalurgëve që marrin shtesën në Tiranë dhe rrethe. "Për periudhën 24 mars - 13 prill 2020, i janë shtuar listës së përfituesve edhe 510 persona, duke e çuar në 10,835 në total deri tani numrin e përfituesve nga ky ligj", thuhet në njoftimin e ISSH. Ndërkohë që gazeta zbardh edhe listën tjetër, atë të miratuar për periudhën 26 shkurt - 24 mars me 754 përfitues. Në skemë janë rreth 23 400 minatorë, naftëtarë dhe metalurgë që përfitojnë. Procesi i aplikimeve nuk është i kufizuar në afat, çka do të thotë që dorëzimi i kërkesës mund të bëhet në çdo kohë. Por avantazhi është që nëse aplikimi kryhet deri në 5 korrik të vitit 2020, pensionistët do të kenë mundësi që të marrin edhe shtesën e 11 muajve paraardhës. Kjo, sepse ligji përcakton që efektet të nisin nga hyrja në fuqi e tij. Thënë ndryshe, nëse do të ketë pensionistë që do të aplikojnë në muajin mars, ata do të kenë mundësi të marrin veç shtesës së muajit mars, edhe shtesën e 7 muajve paraardhës. Nëse do të aplikojnë në prill, do të marrin shtesën e 8 muajve paraardhës e kështu me radhë. Ndërkohë, nëse dorëzimi i kërkesës bëhet pas datës 5 korrik të 2020- s, efektet do të nisin prej momentit të aplikimit, pra hiqet mundësia e marrjes së shtesës për muajt paraardhës. Shtesa për këto tri kategori varion nga 12 për qind deri në 20 për qind mbi masën e pensionit. Ligji i ri përcakton që rritja për minatorët të bëhet me 1 për qind për çdo vit pune në nëntokë, ndërsa për naftëtarët dhe metalurgët me 0.6 për qind. Këtë shtesë mbi pensionin e përfitojnë të gjithë personat që kanë jo më pak se 6 vite në profesionet dhe punët e përcaktuara të vështira dhe shumë të vështira. Për këtë vit, fondi në adresë të skemës suplementare kap vlerën e rreth 14 milionë dollarëve.