Vendimi i ri, shtyhen zgjedhjet në universitete
Kandidati për rektor, Hoxha: Shtyrja e zgjedhjeve, veprim i drejtë
Ministrja e Arsimit, Besa Shahini, ka shtyrë pa afat zgjedhjet në universitete.
Pas debateve, letrave të hapura, akuzave dhe padisë nga organizata "Qëndresa Qytetare", paraditen e sotme, ministrja e Arsimit, Besa Shahini, vendosi që të shtynte datën e zgjedhjeve në universitete deri në një afat të pacaktuar, për shkak të gjendjes së fatkeqësisë natyrore. Në urdhrin e firmosur nga ministrja Shahini theksohet se shtyrja është bërë me qëllim që të marrin pjesë të gjithë studentët, të cilët tashmë janë të bllokuar, për shkak të koronavirusit. "Data e zgjedhjeve për organet drejtuese të IAL- ve shtyhet deri në një moment të dytë kur mund të sigurohet pjesëmarrje më gjithëpërfshirëse e studentëve", shkruhet në urdhrin e Shahinit. Por ajo u kërkon drejtuesve të institucioneve të larta arsimore që të vijojnë përgatitjet, në mënyrë që menjëherë pasi të kthehen, të zhvillohen zgjedhjet. Kjo do të thotë që procesi i regjistrimit të kandidatëve duhet të vijojë për të qenë gati për fushatën në momentin që do të vendoset data e re pas përfundimit të gjendjes së fatkeqësisë natyrore. "Shpresoj që ky urdhër të mundësojë kthimin e vëmendjes së udhëheqësve të arsimit të lartë publik te planifikimi i mbylljes së suksesshme të vitit akademik për studentët", mbyll njoftimin e saj Shahini.
REAGIMI
Kandidati i vetëm deri tani për rektor në Universitetin e Tiranës, dekani i Fakultetit të Drejtësisë, Artan Hoxha, përshëndeti urdhrin e ministres Shahini dhe nga ana tjetër akuzoi rektorin aktual Mynnyr Koni se ka ndërhyrë në zgjedhjet e brendshme. Në një intervistë për "News 24", Hoxha u shpreh se rektori Koni nuk ka kompetenca për të shkarkuar pedagogë. "Shtyrja e zgjedhjeve është një vendim i drejtë. Akti i tij i fundit, i Mynyr Konit, i kundërligjshëm, ka dëmtuar Universitetin e Tiranës në vazhdimësi, edhe në këtë fazë fundore. Zoti Koni nuk ka kompetencë ligjore që të shkarkojë pedagogët në mënyrë individuale. Ligji akademik ka rregulla rigoroze, që thotë se si mund të ikë nga universiteti. Përfundimi është se kur është shkelur rëndë ligji nga një pedagog i caktuar, atëherë thuhet që të mund të shkarkohet një pedagog të caktuar", tha Hoxha. Kandidati i vetëm për rektor u shpreh se do që të jetë në krye të Fakultetit të
Drejtësisë për të sjellë një ndryshim në mënyrën e drejtimit të këtij fakulteti. "Besoj se çdokush do të donte që të drejtonte Fakultetin e Drejtësisë në UT. Kam qenë drejtor juridik i rektoratit për 8 vjet, kam qenë pedagog kaq vjet, kam qenë prokuror. Vlerësoj se mund të jap një kontribut me eksperiencën që kam, të kandidoj për rektor të Universitetit të Tiranës. Është një privilegj dhe një përgjegjësi. Është edhe një reagim personal i imi ndaj mënyrës sesi është drejtuar Universiteti i Tiranës, që më shumë është marrë me konflikte të brendshme, sesa të jetë interesi i studentëve", tha Hoxha