Hapja e kufijve, Meta takon 7 ambasadorët e rajonit
Kreu i shtetit: Hapja graduale do t’i jepte frymëmarrje ekonomisë
Presidenti i Shqipërisë, Ilir Meta, u ka kërkuar ambasadorëve të 7 vendeve të rajonit që të koordinohen për hapjen e kufijve, teksa sezoni turistik veror ka mbërritur. Përmes një njoftimi për mediat, zyra e shtypit e Presidencës bëri me dije se Meta zhvilloi një takim pune me ambasadorët e Greqisë, Kosovës, Kroacisë, Malit të Zi, Maqedonisë së Veriut, Serbisë dhe Sllovenisë. Mësohet se kreu i shtetit u ka kërkuar ambasadorëve të akredituar në vendin tonë që të bashkëpunojnë për hapjen graduale të kufijve. “Masat e ndërmarra nga vendet tona treguan efikasitet dhe së bashku tashmë duhet të koordinojmë veprimet për të hyrë në një fazë të re të zbutjes së masave kufizuese. Një hapje graduale dhe e kujdesshme e kufijve, si dhe lehtësimi i masave shtrënguese, do t’i jepnin frymëmarrje dhe impuls ekonomisë në përgjithësi dhe turizmit në veçanti, si një degë e rëndësishme e ekonomisë së vendeve tona”, u shpreh Presidenti. Ndërkohë, në pjesën tjetër të takimit, ambasadorët dhe kreu i shtetit kanë biseduar për solidaritetin e BE- së me vendet e Ballkanit Perëndimor. “U vlerësua gjithashtu edhe mbështetja reciproke në këtë periudhë pandemie, si dhe u shpreh mirënjohja për solidaritetin dhe asistencën e Bashkimit Europian për të gjitha vendet tona për të përballuar situatën e krijuar nga pandemia COVID- 19”, thuhet në njoftimin për shtyp të Presidencës. Po ashtu, në takimin e zhvilluar në zyrën më të lartë të shtetit, Presidenti Meta theksoi se pandemia dhe tërmeti që goditi vendin tonë nëntorin e kaluar treguan se sa të rëndësishme janë marrëdhëniet me fqinjët.
“Fqinjët na u gjendën të parët pas tërmetit tragjik të 26 nëntorit”, theksoi kreu i shtetit, ndërsa shtoi se duhet rritur bashkëpunimi në fushën e emergjencave civile. Sakaq, ai u zotua se Shqipëria do të përmbushë të gjitha kushtet e Këshillit të Europës sa i përket integrimit europian. “Pavarësisht pandemisë COVID19, Shqipëria do të mbetet e fokusuar në plotësimin në kohë të të gjitha kushteve që Këshilli ka përcaktuar për vendin tonë për Konferencën e Parë Ndërqeveritare për çeljen e negociatave të anëtarësimit në BE”, përfundoi Presidenti Meta.