Lëvizja në bashkitë e gjelbra, nga e hëna deri në orën 21: 00
“Nga 18 maji hapen baret, në 1 qershor çerdhet dhe kopshtet”
Duke filluar nga e hëna e në vazhdim, në 54 bashki, në të cilat nuk rezulton të ketë asnjë person të infektuar me Covid- 19, do të lejohet lëvizja e njerëzve dhe automjeteve deri në orën 21: 00.
Qytetarët apo drejtuesit e automjeteve, të cilit do të lëvizin në bashki, nuk do të kenë nevojë të marrin asnjë lloj leje. Qarkullimi ndërqytetës me automjet privat brenda gjithë kësaj pjese do të jetë i lirë, me një regjim orar që do të shtrihet deri në orën 21.00. Për këtë pjesë, do të mbeten në fuqi vetëm rregullat që ndalojnë grumbullimin e më shumë se pesë personave, aktivitetet kulturore e sportive të çdo lloji, transportin publik, si edhe njësitë ekonomike ende të mbyllura”, shkroi Kryeministri Rama në “Facebook”. Por ajo që bie në sy, është se do të vijojnë kufizimet e lëvizjes njësoj siç ishin këtë javë në 7 bashkitë më kryesore të vendit, por që kategorizohen si me rrezik për shpërndarjen e koronavirusit, pasi kanë ende të infektuar aktiv. Për Tiranën, Durrësin Shkodrën etj. Në këto bashki, nuk do të lejohet të hyjë apo të dalë asnjë automjet i paautorizuar. “Nga e hëna e ardhshme do të mbeten vetëm Zonat e Kuqe të përcaktuara në hartën bashkëngjitur, bashkitë Shkodër, Kurbin, Krujë, Durrës, Tiranë dhe Fier, ku do të vazhdojë i njëjti regjim oraresh lëvizjeje dhe rregullash të qarkullimit si deri tani. Këto zona do të blindohen me postblloqe dhe nuk do të lejohet hyrje- dalja e automjeteve të paautorizuara”, shkroi Rama. Ndërkohë, ndonëse kjo javë që po lëmë pas ka pësuar një rënie të ndjeshme të numrit të të infektuarve, kreu i qeverisë njoftoi se fundjava do të ketë të njëjtat kufizime, si një javë më parë. Por ai paralajmëroi se nëse edhe java e ardhshme do të vazhdojë me shifra të përafërme me këtë javë, do të jetë fundjava e fundit që u nënshtrohet këtyre kufizimeve.
HAPJA Fillimi i javës do të shënojë një tjetër hapje të bizneseve. Kështu duke filluar nga e hëna më 11 maj do të ushtrojnë aktivitetin e tyre deri në orën 17: 30 Baret, restorantet, qendrat tregtare, berberët dhe parukeritë. Ministrja Manastirliu i bëri thirrje që të rrespektojnë protokollin e sigurisë. Ndërkohë, përmes një deklarate për mediat, ministrja e Shëndetësisë, Ogerta Manastirliu, shpjegoi edhe fazën e tretë të hapjes që fillon më 18 maj, ku përfshihen baret dhe restorantet. Kjo do të kushtëzohet nga vijimi i situatës së pandemisë. “Do të fillojë zhvillimi i procesit mësimor dhe provimeve të maturës shtetërore sipas udhëzimeve dhe protokolleve të miratuara nga Ministria e Shëndetësisë. Po në këtë datë, planifikojmë të hapen njësitë e shërbimit, bare dhe restorante, vetëm në ambientet e jashtme, deri në orën 17: 30. Duke filluar nga data 18 maj, shtohen fluturimet e riatdhesimit, me detyrimin për vetekarantiim në banesë”, tha ministrja Manastirliu. Lehtësira janë parashikuar edhe për vizitat në muze dhe për stërvitjen e sportistëve. “Prej datës 18 maj, planifikohet të hapen nën rregulla rigoroze, muzetë, galeritë e arteve dhe sitet arkeologjike, sipas protokolleve dhe udhëzimeve të miratuara. Nga data 18 maj do të lejohen me protokolle dhe masa sigurie edhe stërvitjet individuale të sportistëve në ambiente të hapura. Do të vijojnë të jenë të ndaluara aktivitetet kulturore dhe sportive në ambientet e hapura dhe të mbyllura”, tha Manastirliu. Ndërkohë, në një fazë më të vonshme, duke filluar nga 1 qershori parashikohet të hapen edhe çerdhet, kopshtet publike dhe private, por ajo nënvizoi se duhen kushte strikte higjieno- sanitare. “Dëshiroj të ndalem këtu, duke theksuar nevojën e një vlerësimi të thellë dhe shumë të kujdesshëm të kushteve higjieno- sanitare për çdo strukturë të kopshteve e çerdheve dhe standardeve që duhet të plotësojnë për të mirëpritur fëmijët në këto institucione me rregullat e reja. Protokollet e sigurisë do të bëhen të njohura në ditët në vijim”, përfundoi ministrja.