PD: Anulimi, një fitore e studentëve, Rama donte ta kontrollonte

Partia Demokratike e ka mënjanuar në listën e fitoreve, vendimin e Ministrisë së Arsimit për të shtyrë në një moment të dytë zgjedhjet në universitete. Përmes një deklarate të shpërndarë nga zyra e shtypit, PD akuzon Kryeministrin Rama se donte të kapte universitetet, duke zhvilluar zgjedhje në një kohë kur funksionimi i tyre është i cunguar. "Tërheqja e qeverisë nga krimi zgjedhor i mbajtjes së zgjedhjeve pa zgjedhës në arsimin e lartë, është një betejë e rëndësishme e fituar nga pedagogët dhe studentët, me mbështetjen e opozitës. Me një proces të paligjshëm dhe absurd, Edi Rama synonte të merrte nën kontroll edhe arsimin e lartë përmes ushtarëve të tij dhe të organizatave kriminale", thekson PD. Sipas selisë blu, Kryeministri Rama donte të vepronte me zgjedhjet në universitete njësoj si me ato për qeverinë. "Rekordet e Edi Ramës me arsimin e lartë janë të njëjta me rekordet e tij për zgjedhjet. Kur nuk i fiton dot, përdor çdo mjet të pistë për pushtetin e tij. Mbajtja e zgjedhjeve në arsimin e lartë pa pedagogë dhe studentë, në kulmin e masave të jashtëzakonshme, nuk ndryshon nga akti i tij kriminal i 4 viteve më parë, kur tentoi të kapë Universitetin e Tiranës përmes Emiljano Shullazit", vijon reagimi i PD. Teksa garanton studentët se opozita nuk ndërhyn në autonominë e universiteteve, PD dënon presionin ndaj pedagogëve. "Partia Demokratike dënon presionin dhe shantazhin e ushtruar gjatë këtyre ditëve ndaj pedagogëve dhe studentëve dhe paralajmëron Edi Ramën dhe veglat e krimit të organizuar brenda arsimit të lartë që të mbajnë larg duart nga universitetet", thekson PD.