Terrorizmi, marrëveshje me SHBA për emrat e pasagjerëve
Ministri i Brendshëm, Sandër Lleshaj, dhe ambasadorja e SHBA- së, Yuri Kim, nënshkruan dje një memorandum bashkëpunimi që ka të bëjë me sigurinë kombëtare të të dyja vendeve, në thelb të të cilit është shkëmbimi i informacioneve në kohë të shpejtë mes agjencive ligjzbatuese, përkatësisht strukturave të sigurisë kufitare. Ministri Lleshaj theksoi se kjo është një marrëveshje e rëndësishme, e cila zgjeron më tej mundësitë dhe kapacitetet e bashkëpunimit mes qeverive të Shqipërisë dhe të SHBA- së, në parandalimin dhe luftën kundër krimit dhe terrorizmit. "Ky është një hap tjetër drejt thellimit të partneritetit strategjik me SHBA- në, i cili sjell më shumë siguri për qytetarët dhe pak hapësirë për veprimtaritë kriminale dhe terroriste", nënvizoi ministri Lleshaj. Nga ana tjetër, ambasadorja Yuri Kim tha se terrorizmi është një kërcënim për të gjithë, nuk bën dallime, nuk pyet për kufijtë, madje përpiqet të mos vërë re kufijtë, por ndryshe nga ' korona', në këtë rast ne mund të bëjmë diçka ndaj tij. "Shqipëria ka bërë një hap para përmes këtij memorandumi bashkëpunimi dhe kjo do të na japë mundësi të dyja palëve, SHBA e Shqipëri, të jenë më efektive në identifikimin dhe ndalimin e terroristëve dhe keqbërësve të tjerë", tha Kim. Ndërsa shtoi se, ashtu sikurse dëshmohet përmes këtij memorandumi, edhe njëherë nënkupton që Shqipëria mund të bëhet një kontribuues neto i sigurisë për rajonin, por edhe për botën. "Gjithashtu, e përgëzojmë qeverinë e Shqipërisë për përkushtimin e saj të vazhdueshëm në përmirësimin e sigurisë kufitare, siç dëshmohet nga bashkëpunimi i rritur me ambasadën e Shteteve të Bashkuara të Amerikës, për një sërë çështjesh të sigurisë rajonale të lidhura me kufijtë", u shpreh Yuri Kim. Ministri Lleshaj sqaroi se në thelb, memorandumi që u nënshkrua dje ka për qëllim rritjen e nivelit të shkëmbimit të informacionit të sigurisë midis autoriteteve shqiptare dhe amerikane, në funksion të parandalimit të krimit, të parandalimit të terrorizmit dhe të lehtësimit të të gjitha procedurave që mundësojnë që institucionet tona të shkëmbejnë pa burokraci të tepërta. "Të shkëmbejnë informacion në kohë reale. Të kenë avancë në kohë ndaj të gjitha rrjeteve kriminale, përfaqësuesve të krimit, kryesisht terrorizmit. Pra, me qëllim që të jemi përherë një hap para, në mënyrë që të jemi në gjendje të parandalojmë dhe të godasim sa herë që është e nevojshme, të gjithë ata që cenojnë sigurinë e Shqipërisë apo sigurinë e Amerikës, apo sigurinë e aleatëve tanë", tha Lleshaj.