Ngjela mbron idenë e Ramës për kanabisin: Propozimi i parë nga im atë Kiço Ngjela, pse ia refuzoi Enver Hoxha
“Kiço Ngjela i kërkoi 100 mijë hektarë, sipas biznesplanit atëherë do fitoheshin 2 miliardë USD. Hoxha i tha ku t’i çoj unë gjithë këto para”
Avokat Spartak Ngjela shprehet pro legalizimit të kanabisit për arsye shëndetësore dhe tregon se kjo ka qenë një nismë e babit të tij në kohën e monizmit si ministër i Ekonomisë dhe Financave.
Sipas Ngjelës, Shqipëria në atë kohë do të përfitonte 2 miliardë dollarë nga kultivimi i kanabisit, por ky propozim kishte gjetur kundërshtimin e Enver Hoxhës. “Nëse do bëhet me ligj, dhe këtë e ka në dorë shteti, por kjo nuk është e re, është shumë e vjetër, se nuk kam si të jem kundër si iniciativë, se ligjin s’e kemi parë. Pasi im atë që ka qenë këtu e 27 vjet ministër Ekonomisë dhe dy vjet ministër i Financave i ka pasur në axhendën e vet bimët medicianale, ku hynte kanabis dhe nja katër bimë të tjera. Ai kërkoi 100 mijë hektarë dhe sipas biznesplanit atëherë, do fitoheshin 2 miliardë dollarë. Ishte 20 mijë dollarë hektari. Ai dërgoi ekipin e vet, vajti vetë me gjigantët e farmaceutikës botërore. Por këta i dhanë 9 mijë hektarë dhe Kryeministri ia bëri me shenjë se s’kam ç’bëj, por shko tek Enver Hoxha. Hoxha i tha ‘ a jeni në vete apo s’jeni në vete?’. Ai i tha ku t’i çoj unë gjithë këto para. Llogarite sa mendje kriminale kishin këta njerëz. Sepse donte varfërinë e njerëzve, këtu njerëzit nuk kishin bukë, ai thoshte ku t’i çoj këta para. Si të jem kundër, kur kjo vjen nga familja ime. Duhej bërë me kohë. Unë nuk mund të jem kundër një iniciative që vjen nga familja ime dhe jam i bindur që kjo duhej bërë me kohë”, tha Ngjela në emision “Top Talk” me gazetarin Denis Dyrnjaja.
PROPOZIMI
Ngjela tha se legalizimi i kanabisit do t’i shërbente shumë popullit shqiptar. Sipas tij, si garantor është nocioni i ligjit si dhe kontratat e bëra me kompanitë e mëdha botërore të farmaceutikës, që do të përdorin kanabisin legal. “Shqiptarët janë në prag të mungesave të mëdha. Nuk mund të jemi kundër iniciativave të tilla që na nxjerrin nga kjo situatë. Kriza ka trokitur në derë. Nuk është kërkesë e parë që e ka bërë një privat. Ai tha ta bëjmë si në Holandë. Shoqëria shqiptare e ka në interes këtë gjë. Kryesor është interesi i shqiptarëve. Po nuk flasim dot pa parë ligjin. Qeveria ka maxhorancë absolute, nëse e bëjnë me ligj, ai rrëzohet në gjykata. Shumica është populli, por po ju them se historikisht kjo temë ka qenë nën zë për bimët medicinale në Shqipëri dhe ky është gabim i madh që është bërë në Shqipëri, që bujqësia shqiptare rropatet kot, që bujqit me 4- 5 hektarë tokë në pronësi të tyre shkojnë dhe punojnë argatë”, u shpreh avokat Ngjela. Për avokatin e njohur, Kryeministri do të mbajë përgjegjësi nëse nisma ligjore degradon në krim. “Në këto momente, duhet parë ligjin sesi është kontrolli që do t’i bëhet zbatimit të tij, për të shmangur abuzimet. Kalimi nga farmaceutika në trafik nuk është detyra jonë, është detyrë e pushtetit gjyqësor, është e Prokurorisë, e BKH- së. Unë po ju tregoj se cili është prioriteti i ekonomisë shqiptare dhe ky është një nga prioritetet. Nëse e ka kapur Kryeministri këtë ide, besoj se ia kanë thënë të huajt. Do populli shqiptar të qëndrojë i uritur, le të qëndrojë. Krimi është një fenomen që luftohet nga organet e specializuara, nëse ato i thonë Kryeministrit që kjo s’mund të bëhet, nuk do bëhet, përgjegjësia është e Kryeministrit. Kryeministri ndërmerr një ligj që mendon se do krijojë të ardhura të mëdha në buxhet. Por ligji mund të degradojë në krim. Nëse ndërkombëtarët e shikojnë se kjo nismë mund të degradojë në krim, nuk do bëhet. Nëse Kryeministri dështon, do bjerë nga pushteti. Për ne juristët, trafiku quhet tregti e ndaluar”, u shpreh Ngjela.