“Nga 18 maji rinisin operacionet me planifikim”
Ministrja: Po shikojmë mundësinë e hapjes së “Shefqet Ndroqit”
Më 18 maj, datë kur rreth 90% e ekonomisë do të rihapet pas pandemisë së COVID- 19, edhe sistemi shëndetësor do të marrë frymë më lehtë. Ministria e Shëndetësisë parashikon hapjen e kirurgjisë për operacionet me planifikim. Sakaq, edhe spitali “Shefqet ndroqi”, i kthyer në funksion të COVID, do t’u rikthehet shumë shpejt pacientëve që vuajnë nga sëmundjet e mushkërive. Me këtë, e vetmja qendër e trajtimit të pacientëve të prekur nga koronavirusi do të jetë Spitali Infektiv në QSUT. Lajmin për rihapjen graduale të sistemit shëndetësor e bëri me dije e para e këtij dikasteri, Ogerta Manastirliu, dje gjatë inspektimit të spitalit të ri të kirurgjisë. “Edhe sistemi shëndetësor duhet të fillojë rihapjen për sa i përket planifikimit, duke filluar me ndërhyrjet kirurgjikale në të gjithë Shqipërinë. Nga data 18 maj, do të rifillojnë gradualisht operacionet e planifikuara, në spitalet rajonale dhe universitare në të gjithë vendin. Jemi duke vlerësuar me komitetin teknik të ekspertëve rikthimin në normalitet të spitalit ‘ Shefqet Ndroqi”, i cili i është dedikuar Covid- 2. Brenda kësaj jave do të kemi një vendim të komitetit që edhe ky spital të ofrojë shërbimet klasike”, deklaroi ministrja e Shëndetësisë, duke ngarkuar të gjitha strukturat përkatëse në vend të angazhohen në rihapjen graduale të shërbimeve të kirurgjisë. Kirurgët e QSUT, që pritën ministren në ambientet e reja, siguruan se janë gati t’i rikthehen normalitetit gradualisht. “Shërbimi i kirurgjisë është gati, si fillim do të fillojmë me kapacitet më të ulët për të siguruar dhe për të shmangur në maksimum riskun nga Covid. Do ta fillojmë me operacionet që janë më urgjente për ta shtrirë hap pas hapi duke siguruar maksimalisht shërbimin për pacientët, siç kemi bërë përherë”, tha prof. Arben Gjata, pa lënë mënjanë apelin për ruajtjen e distancës fizike dhe higjienën personale. Në bisedën me bluzat e bardha, ministrja nuk mund të linte pa përmendur suksesin e tyre në përballimin e Covid. “Për fatin e mirë janë marrë të gjitha masat dhe nuk kemi pasur asnjë fatalitet në personelin mjekësor. Nga ana tjetër, edhe infektimi ka qenë në nivel të ulët krahasuar me vendet e tjera. Ky është një fakt për t’u lavdëruar në dy aspekte. Së pari, vetë personeli ka qenë shumë i kujdesshëm, por edhe organizimi që është bërë duke përqendruar të sëmurët me Covid në dy spitale, e ka lënë gjithë sistemin tjetër të çliruar”. Gjatë kohës së epidemisë, u ndërprenë ndërhyrjet kirurgjikale të planifikuara, duke lejuar vetëm urgjencat. Shërbimi Infektiv dhe ai i Mushkërive u zhvendosën në Spitalin e Traumës.