Ja çfarë i bën burrat të vuajnë më shumë se gratë nga koronavirusi i ri
Gjaku i meshkujve ka nivele më të larta të një enzime kryesore të përdorur nga koronavirusi i ri për të infektuar qelizat, në krahasim me femrat, sipas rezultateve të një studimi të kryer në Europë, të publikuar të hënën. Studimi përfshiu 11 vende europiane dhe mund të ndihmojë në shpjegimin e sulmit më të madh që ka sëmundja te meshkujt dhe simptomat më të ashpra që shkakton ajo tek ata, në krahasim me rastet të gratë. Një enzimë e gjetur në nivele më të larta në gjakun e meshkujve, me sa duket, është “fajtore” për këtë. “Reuters” raportoi se enzima 2 konvertuese e angiotenzinës ( ACE2) gjendet në zemër, veshkë dhe organe të tjera. Në Covid- 19, sëmundja e frymëmarrjes e shkaktuar nga virusi SarsCoV- 2, mendohet se ajo luan një rol në mënyrën sesi infeksioni përparon në mushkëri. Studimi, i botuar në “European Heart Journal”, gjithashtu zbuloi se ilaçet e përshkruara gjerësisht, të quajtura frenuesit ACE ose bllokuesit e receptorëve të angiotenzinës ( ARBs), nuk çuan në përqendrime më të larta të ACE2 dhe prandaj nuk ndikojnë në rritjen e rrezikut ndaj Covid- 19 për njerëzit që i marrin ato. Frenuesit e ACE dhe ARBs janë të përshkruara gjerësisht te pacientët me insuficiencë kongjestive të zemrës, diabeti ose sëmundje të veshkave. Këto ilaçe krijojnë miliarda dollarë me shitje me recetë në të gjithë botën. “Gjetjet tona nuk mbështesin ndërprerjen e këtyre barnave te pacientët Covid- 19”, tha Adriaan Voors, profesor i kardiologjisë në Qendrën Mjekësore Universitare ( UMC) Groningen në Holandë, i cili bashkëdrejtoi studimin.
Pandemia e Covid- 19 ka infektuar më shumë se 4.15 milionë njerëz në të gjithë botën dhe ka vrarë pothuajse 280,000 njerëz. Numri i vdekjeve dhe infeksionit tregon që burrat kanë më shumë të ngjarë se gratë të kontraktojnë sëmundjen dhe të kenë komplikime të rënda ose kritike nëse preken prej saj.