Basha me prodhuesit: Bizneset s'kanë marrë para nga qeveria
“Qeveria e keqmenaxhoi krizën e shkaktuar nga pandemia”
Kryetari i Partisë Demokratike, Lulzim Basha, akuzoi dje qeverinë se po keqmenaxhon situatën e krijuar pas pandemisë.
Gjatë takimit me përfaqësuesit e Shoqatës së Bashkimit të Prodhuesve Shqiptarë, Basha u shpreh se pandemia ekonomike po shkatërron çdo sektor të ekonomisë, duke rritur ndjeshëm varfërinë dhe papunësinë. Ai akuzoi Kryeministrin Rama se nuk ka ofruar mbështetje për bizneset, që sipas tij po falimentojnë ditaditës. "Kam parë dhe takuar vetë njerëz që nuk kanë marrë asnjë lek nga qeveria, biznese që nuk kanë përfituar asnjë ndihmë dhe po mbyllen dita- ditës. Qeveria e keqmenaxhoi krizën e shkaktuar nga pandemia në dëm të shqiptarëve dhe në favor të miqve të saj. 41.5 milionë euro ka dhënë Edi Rama për 3 milionë shqiptarë, ku janë qindra e mijëra të papunë dhe biznese gati për t'u mbyllur, ndërkohë që po kaq u ka dhënë qeveria klientëve të saj për 2 km rrugë tek Unaza e Re", tha kryedemokrati Basha. Ndërkohë, vetë përfaqësuesit e Shoqatës së Bashkimit të Prodhuesve Shqiptarë shprehën shqetësimin se prodhuesit nuk kanë përfituar nga asnjë paketë e qeverisë deri më tani. Po ashtu, sipas njoftimit të zyrës së shtypit të PD- së, prodhuesit iu ankuan kryedemokratit Basha se nuk kanë likuiditet dhe akses në kredinë sovrane. "Përfaqësuesit e Shoqatës së Bashkimit të Prodhuesve Shqiptarë shprehën shqetësimin e thellë për uljen e ndjeshme të prodhimit dhe të eksporteve, por edhe për humbjen e vendeve të punës, faktorë që kanë prekur pjesën dërrmuese të bizneseve prodhuese. Paketat ekonomike të qeverisë nuk e kanë ndihmuar aspak këtë sektor, që çdo ditë e më shumë po varfërohet dhe rrënohet nga pandemia e krizës ekonomike. Mungesa e likuiditetit në zinxhirin prodhues, shoqëruar dhe me mungesën e aksesit në garancinë sovrane, janë faktorë shtesë që e bëjnë sektorin e prodhimit shqiptar një nga më të rrezikuarit nga falimentimi për shkak të keqmenaxhimit të ekonomisë gjatë periudhës së pandemisë", citohen të kenë thënë prodhuesit shqiptarë. Nga ana tjetër, zyra e shtypit të PD- së thekson se kryedemokrati Basha ka mbështetur shqetësimet e prodhuesve dhe kërkesat e tyre i vlerëson si rrugën e vetme për të dalë nga kjo situatë. "Kryetari Basha i konsideroi të drejta shqetësimet e ngritura nga Shoqata e Bashkimit të Prodhuesve Shqiptarë dhe i siguroi ata se PD- ja do të jetë në krah të biznesit, duke mbështetur kërkesat e tyre legjitime, si rruga e vetme për të shmangur katastrofën ekonomike dhe humbjen e dhjetëramijëra vende pune", thuhet në njoftimin e PD- së.