Çela: Kultivimi i kanabisit është rritur në 4 qarqe
“Shtohen rastet e mbjelljeve në Gjirokastër, Krujë, Vlorë e Shkodër. Problem mungesa e prokurorëve”
Edhe pse detyrën e Kryeprokurorit e mori në muajt e fundit të 2019ës, Olsian Çela raportoi në Komisionin e Ligjeve gjithë punën e vitit të shkuar nga Prokuroria e Përgjithshme.
Para deputetëve të këtij komisioni, Çela ka folur për disa nga problematikat që janë hasur gjatë vitit që u la pas, por edhe planet për këtë vit.
GJENDJA E KRIMINALITETIT
Në raportimin e tij, ai foli fillimisht për gjendjen e kriminalitetit në vend, duke theksuar se ka një rritje krahasuar me vitin e mëparshëm. “Gjatë vitit 2019, janë kryer hetime proaktive me përdorim të mjeteve të posaçme të hetimit, në kuadrin e 309 procedimeve për veprat penale kundër krimit të organizuar, trafiqeve të paligjshme përfshi dhe veprat penale kundër narkotikëve, pastrimit të parave dhe krimeve të rënda të tjera të lidhura me to, ose me rritje 23,6 për qind krahasuar me vitin 2018. Sa i përket tendencës, vërehet se rritjen më të lartë për vitin 2019 e ka Qarku Gjirokastër me 15,39 %, ndërsa në Qarkun Shkodër vërehet ulje e koeficientit të kriminalitetit me 20,61 %. Sa i përket raportit të ndarjes së veprave penale ( krimeve dhe kundërvajtjeve), bazuar në statistikat e vitit 2019, rezulton se 83 % e procedimeve penale i përkasin krimeve dhe 17 % i përkasin kundërvajtjeve penale”, tha Çela.
KULTIVIMI I KANABISIT
Më tej, Kryeprokurori foli edhe për një problem që vijon të mbetet shqetësues, siç është kanabizimi. Sipas tij, viti 2019 ka parë një rritje të kultivimit të kanabisit, kryesisht në zonat e Krujës, Vlorës, Gjirokastrës dhe Shkodrës. Çela nuk dha një shpjegim për këtë fenomen, por shtoi se do duhet një bashkërendim i punës me Policinë për të gjetur një zgjidhje. “Ky është një fenomen i përqendruar në disa qarqe. Kemi vënë re një rritje të kultivimit të kanabisit në qarqet Krujë, Vlorë, Gjirokastër, ndoshta Shkodra, ku problemet janë konstante. Për të pasur një përgjigje pse ka ndodhur kjo rritje e fenomenit? Në fakt do bëj një analizë paraprake jo vetëm brenda strukturës së Prokurorisë, por edhe Policisë së Shtetit, për të kuptuar cilat kanë qenë masat parandaluese nga ana e tyre në këto qarqe. Cila ka qenë përgjigja e Prokurorisë në raport me referimet që kanë bërë dhe si ka qenë efikasiteti i bashkëpunimit mes Prokurorisë përgjatë vitit 2019 edhe në vitet paraardhëse. E them këtë, sepse janë pikërisht këto elemente që nga analiza që zhvillova në rrethet gjyqësore, ua kërkova prokurorëve që t’i evidentonin e të cilat nuk ishin evidentuar. Pra, problemet reale se prese ne ende nuk kemi një trend rritjeje të disa veprave penale dhe se si i kemi përballuar këto fenomene. Nuk ka sot një dokument zyrtar të përpiluar nga Policia e Shtetit apo Prokuroria për të analizuar shkaqet reale se pse ka ndodhur”, u shpreh Kryeprokurori Çela.
Mungesat në prokurori Gjatë raportimit online në komision, Çela shtroi edhe një problem për institucionin që drejton, siç është ulja e numrit të prokurorëve. Ky ulje, që është pasojë e vetingut, sipas Çelës mund të zgjidhet me rritjen e numrit të oficerëve të OPGJ dhe shtimin e stafit ndihmës për ata prokurorë që do e kalojnë këtë proces filtrues. “Dua të them që jemi në proces të vazhdueshëm të ndryshimit të shifrave, sa i përket numrit të prokurorëve, për shkak të procesit të vetingut. Numri është ulur ndjeshëm, jemi diku te 260- 270 prokurorë. Numri i oficerëve të Policisë Gjyqësore është i papërfillshëm. Ajo që lind është se si do të ndikojë ky reduktim i numrit të prokurorëve që është konstant dhe përgjatë gjithë vitit 2020 kam frikë se do të rëndohet, për shkak të vetingut. Nga një analizë paraprake që ne kemi bërë, rezulton se për vitet në vijim, që nevojat për prokurorë nuk plotësohen nga prurjet nga magjistratura, që përkthehet në mbingarkesën prokurori dhe zvarritje të proceseve gjyqësore. Ne kemi menduar si reagim për rënien konstante të numrit të prokurorëve në sistem, duke marrë në konsideratë edhe pamundësinë e shkollës së magjistraturës për të qenë e aftë që brenda kohës të na zëvendësojë mungesat, kemi parë si zgjidhje rritjen e oficerëve të Policisë Gjyqësore dhe të stafit ndihmës. Duam që t’i vënë në dispozicion një prokurori një oficer të OPGJ dhe një sekretare”, deklaroi Kryeprokurori.