Bilanci, gjatë periudhës së karantinës u liruan 20 të burgosur
Gjykata e Posaçme kundër Korrupsionit dhe Krimit të Organizuar bëri të ditur dje se gjatë periudhës së karantinës janë liruar nga burgu 20 të paraburgosur, pasi kanë qenë në gjendje të rënduar shëndetësore ose në moshë. Lajmi u bë i ditur nga GJKKO me anë të një komunikimi për mediat. “Gjatë periudhës së pandemisë COVID- 19 është vendosur ndryshimi i masës së sigurisë nga ‘ Arrest në burg’ në ‘ Arrest në shtëpi’ për 20 të paraburgosur. Kryesisht kjo është vendosur pasi është konstatuar gjendja e rënduar shëndetësore e tyre dhe mosha e madhe”, bëri të ditur GJKKO. Më tej, gjykata njoftoi dhe çështjet e shqyrtuara gjatë karantinës, që janë 104 kërkesa në hetime paraprake ndërkohë seancat e mbajtura janë 81, nga të cilat 37 çështje themeli, 21 paraprake, 15 masa sigurimi, 2 konfiskime dhe 5 me video- konferencë. Në Shkallën e Parë të kësaj gjykate ka pasur dyshime për një prej gjyqtarëve si të prekur nga Covid19, por pas kryerjes së testit nga ISHP, ka rezultuar negativ. “Në Gjykatën e Posaçme të Shkallës së për Korrupsionin dhe Krimin e Organizuar dhe atë të Apelit nuk ka të persona të prekur nga COVID- 19. Nga ana e Institutit të Shëndetit Publik është ofruar mundësia për bërjen e testit dhe ne jemi lidhur me këtë institucion. Është kryer testimi për një nga gjyqtarët e Gjykatës së Posaçme të Shkallës së Parë për Korrupsion dhe Krimin e Organizuar dhe rezultati i testimit ka rezultuar negativ. Nuk ka pasur kërkesa të tjera nga gjyqtarë ose pjesëtarë të stafit administrativ”. Në lidhje me kërkesat për sekuestrim pasurie, në GJKKO janë paraqitur 43 të tilla, nga të cilat për 40 është dhënë miratimi dhe 3 janë end në shqyrtim. “Deri më tashmë janë paraqitur 43 kërkesa për sekuestrim pasurie. Nga këto 40 kërkesa janë pranuar, ndërsa 3 të tjera janë në shqyrtim e sipër. Nuk kemi pasur raste të refuzimit të kërkesave por theksojmë se këto kanë qenë kërkesa me objekt sekuestrimin e pasurive”, njoftoi GJKKO. Gjyqtarja për mediat, Saida Dollani, në komunizmin publik tha se nga nisja e funksionimit të GJKKO në 19 janar 2020 ka pasur vetëm një kërkesë të një gjyqtari për vënien nën ruajtje të posaçme. Sipas saj, kërkesa në fjalë është vlerësuar nga Komisioni për Mbrojtjen e Gjyqtarëve pranë KLGJ, i cili ka vendosur të mos e miratojë atë.