Shameti: Reforma në Drejtësi në ngërç, t’i bëjmë një rikontroll
Gjatë raportimit të Prokurorit të Përgjithshëm, Olsian Çela, në Komisionin e Ligjeve, anëtari i këtij komisioni, Adnor Shameti, ka bërë një propozim të guximshëm. Duke bërë një pasqyrim të gjendjes aktuale të sistemit, ku sipas tij ka një ngërç në ringritjen e Gjykatës së Lartë dhe asaj Kushtetuese, Shameti bëri thirrje që të bëhet një rishikim i tyre. “Nisur dhe nga raportimi i Prokurorit të Përgjithshëm, unë nuk mund të rri pa përmendur disa shqetësime të mia në lidhje me Reformën në Drejtësi dhe gjithë problematikën që sot institucionet e reja të drejtësisë reflektojnë. Ne si Kuvend ndoshta kemi akoma për të dhënë në lidhje me kontroll institucional të institucioneve të pavarura dhe të organeve të reja drejtësisë, apo me dhënien e rekomandimeve politike në lidhje me aplikimin në praktikë, në raport me atë se çfarë kemi miratuar ne në ligjet e Reformës në Drejtësi. Unë do të thosha që sado të mira të kenë qenë mendimet, apo qëllimet e baballarëve të Reformës në Drejtësi në vitin 2016, ne si komision, si Parlament apo edhe si maxhorancë të bënim një kontroll të mëpasshëm atij legjislacioni, që është për t’u vlerësuar pa diskutim, në lidhje me Reformën në Drejtësi”, tha Shameti. Sipas deputetit socialist ka një bllokim dhe ngadalësim të plotësimit të këtyre dy gjykatave dhe një ide që mund të ndihmonte, do të ishte edhe ulja e kritereve për ata që përzgjidhen anëtarë në këto dy gjykata. “Unë shoh që më së shumti në çështjet e konstituimit të trupave të organeve të reja të drejtësisë të kemi mangësi të dukshme. Këto unë i shikoj në radhë të parë në konstituimin e trupës së Gjykatës së Lartë dhe Gjykatës Kushtetuese. Duhet të shikojmë se ku çalon puna realisht në bërjen të mundur, në vënien në praktikë të përmbushjes së këtij detyrimi kushtetues. E them këtë, sepse në praktikë ka një ngërç dhe kur aty ka një ngërç, ne nuk mund të rrimë kurrsesi indiferent, sado që de jure i kemi kryer detyrat e shtëpisë. Unë e shikoj atë që numri i aplikimeve për t’u bërë anëtar i Gjykatës së Lartë është shumë i vogël. Numri i atyre që kualifikohen në përzgjedhjen përfundimtare nga KLGJ dhe KED është shumë i kufizuar dhe një gjë e tillë duhet të në shqetësojë. Unë mendoj se këtu ka diçka që çalon. Në këto kushte, do të sugjeroja që ndoshta edhe ato kushtet në përzgjedhjen e gjithë këtyre kandidatëve për të qenë anëtar të Gjykatës së Lartë apo Kushtetuese, duhet të shikoheshin ndryshe”, theksoi deputeti i PS.