Ilir Meta kthen “Prokurimet”: Cenon Kushtetutën
"Krijon hapësira edhe për mallra e shërbime që mund të mos lidhen me sigurinë dhe mbrojtjen"
Presidenti Meta shpalli 5 dekrete dje. Në katër prej tyre, Meta ishte pro vendimmarrjes së Kuvendit, duke dekretuar ligjet për faljen e gjobave të vendosura për shkeljen e karantinës gjatë marsit dhe prillit, por edhe disa marrëveshje ndërkombëtare, kryesisht me karakter ekonomik.
Por kreu i shtetit ka kthyer për rishqyrtim në Kuvend ligjin për "Prokurimet në fushën e mbrojtjes dhe të sigurisë", duke e cilësuar atë si në kundërshtim me disa parime të Kushtetutës. Krahas dekretit, si zakonisht, Presidenti ka renditur gjithë argumentet ligjore se pse nuk e firmosi ligjin e miratuar nga shumica në Kuvend, por e ka kthyer atë mbrapsht për rishqyrtim. "Pavarësisht qëllimit pozitiv të deklaruar të kësaj nisme ligjore, mënyra e formulimit të disa prej dispozitave që lidhen me shtrirjen e zbatueshmërisë së këtij ligji, cenojnë parime të rëndësishme kushtetuese. Nga shqyrtimi i përmbajtjes së disa dispozitave konkrete të ligjit, mungesa e përcaktimit të qartë e shterues të fushës së zbatimit të këtij ligji, sa i përket llojit të mallrave dhe shërbimeve që mund të prokurohen sipas përcaktimeve të tij, krijon hapësirë që jo vetëm të shmangen procedurat e hapura për prokurimet në fushën e mbrojtjes dhe të sigurisë, por dhe të ulet ndjeshëm mundësia e biznesit vendas për pjesëmarrje në këto procedura prokurimi, ku kriter kryesor është pasja e CSI- së ( Certifikatës së Sigurimit Industrial)", thuhet ndër të tjera në relacionin shpjegues të parashtruar nga Presidenti Meta. Po ashtu, Meta vë theksin në mungesën e përcaktimit të një fushe të qartë të zbatimit të këtij ligji. Sipas arsyetimit të bërë nga Kreu i Shtetit, kjo mangësi cenon disa parime të Kushtetutës dhe i dëmton parimet e veprimtarisë ekonomike dhe barazisë përpara ligjit. "Mungesa e përcaktimit të qartë të fushës së zbatimit të këtij ligji, sa i përket objektit jo shterues të mallrave dhe shërbimeve që mund të prokurohen sipas tij, cenon parimin e lirisë së veprimtarisë ekonomike, barazisë përpara ligjit, me pasojë diskriminimin e operatorëve të ndryshëm në treg, duke rritur mundësitë për dëm ekonomik ndaj financave të shtetit. Pikërisht kjo, bie ndesh me parimet kushtetuese të sipërcituara", theksohet në shpjegimin e Metës. Presidenti nënvizon se ky ligj, për mënyrën se si është formuluar, lë hapësirë që të mund të përdoret edhe për prokurime që mund të mos lidhen me mbrojtjen dhe sigurinë dhe mund të jenë të atilla që të kërkojnë mbrojtjen e elementeve të sigurisë edhe në prokurim. "Për të gjetur balancën në mbrojtjen e këtij interesi, dispozitat e ligjit duhet të kenë gjithmonë një qartësi të tillë në fushën e zbatimit të tij, në mënyrë që të mos lënë vend për përdorimin e procedurave që nën justifikimin subjektiv apo mbulimin me nevojën për siguri të krijohet një hapësirë e pakontrolluar për të shmangur konkurrencën e lirë përmes përjashtimit të operatorëve ekonomikë në prokurimin e mallrave dhe shërbimeve të caktuara, që jo domosdoshmërish lidhen me mbrojtjen dhe sigurinë dhe mund të jenë të atilla që të kërkojnë mbrojtjen e elementeve të sigurisë edhe në prokurim", thuhet në relacion.