Arrestohen dy të rinj, kultivonin lëndë narkotike në Kuçovë

Dy persona kanë rënë në prangat e Policisë, pasi u zbuluan se kultivonin bimë narkotike. Sipas burimeve të Policisë, dy të arrestuarit në një ndërtesë të pabanueshme, në fshatin Demollarë në Kuçovë, kanë kultivuar rreth 100 kubikë kanabis, të cilat janë sekuestruar më pas nga Policia. Ndërkohë, materialet procedurale në ngarkim të tyre i kaluan Prokurorisë së Rrethit Gjyqësor Berat, për veprat penale "Kultivim i bimëve narkotike" e kryer në bashkëpunim, parashikuar nga nenet 284 dhe 25 të Kodit Penal.

OPERACIONI

Operacioni i koduar "Diga" vuri në pranga dy shtetas që kultivonin bimë narkotike. Sekuestron 100 kubikë kanabis në një banesë të pabanueshme në fshatin Demollarë në Kuçovë. Pas informacioneve të marra në rrugë operative, efektivët e Komisariatit të Policisë Kuçovë kanë finalizuar me sukses operacionin e koduar "Diga", duke sekuestruar në një banesë të pabanueshme në fshatin Demollarë të qytetit të Kuçovës 100 kubikë me bimë narkotike canabis sativa, të gatshme për t'u kultivuar. Në pranga kanë rënë dy kultivuesit e bimëve narkotike: shtetasit Gerald Gjika ( Klevis Sina), 30 vjeç, dhe Gentjan Bilishi, 37 vjeç, të dy banues në lagjen "1 Maji" në qytetin e Kuçovës. Blutë e Kuçovës ishin njoftuar se të dy këta shtetas merreshin me kultivimin e bimëve narkotike dhe banesa e vjetër ku u gjetën 100 kubikët me canabis ishte në pronësi të dajës së Geraldit, i cili jeton në Greqi. Fakti që banesa e dajës së Geraldit ishte bosh dhe për të kujdesej vetë nipi i tij Geraldi, i ka favorizuar të rinjtë për ta përdorur banesën për kultivim të bimëve narkotike.