Bie numri i të infektuarve, në 24 orë, 4 raste të reja

“Është numri më i ulët i rasteve, i përllogaritur në 8 javët e fundit”

E hëna regjistroi një tjetër ditë me bilanc pozitiv. Në 24 orët e fundit, sipas Ministrisë së Shëndetësisë, janë konfirmuar vetëm 4 raste të reja.

Një shifër kjo më e ulëta në harkun e 8 javëve të fundit, e cila mund të shihet edhe si sinjal që paralajmëron pikëkthesën që të gjithë presim. “Ju bëjmë me dije të dhënat e 24 orëve të fundit të situatës së COVID19 në Shqipëri. Situata epidemiologjike në vend paraqitet e qëndrueshme mbështetur në identifikimin e rasteve të deritanishme dhe gjurmimin epidemiologjik në mënyrë aktive. Bazuar në të dhënat e deritanishme vlerësohet se numri efektiv i riprodhimit nga data 24 prill e në vazhdim ka zbritur nën kufirin kritik ( për R < 1). Sot është numri më i ulët i rasteve ditore pozitive, e përllogaritur në 8 javët e fundit”, tha përfaqësuesja e Task- Forcës Eugena Tomini. Sipas të dhënave zyrtare, harta është zgjeruar në Tiranë, Shkodër dhe Kamzë. Ndërkohë që nuk është regjistruar asnjë rast i ri në Krujë, e cila e ka mbyllur ditën më bilanc zero. “Në 24 orët të fundit janë testuar 121 qytetarë të dyshuar si të prekur me Covid- 19 dhe kanë rezultuar pozitivë 4 qytetarë, përkatësisht 2 qytetarë në Tiranë, 1 në Kamëz dhe 1 në Shkodër. Të shëruar janë 4 qytetarë. Deri më sot janë konfirmuar pozitivë me COVID- 19 në të gjithë vendin 872 qytetarë”.

Pjesa më e madhe e të infektuarve janë duke u ndjekur në kushte shtëpie nga mjeku i familjes, vetëm 28 janë në spital. “654 qytetarë janë shëruar, ose 75% e të gjithë të prekurve. Në të gjithë vendin, aktualisht janë 187 persona aktivë me COVID- 19, kryesisht ne Tiranë, Krujë, Shkodër, Kamëz. Situata në spitale paraqitet e qëndrueshme prej ditësh. Aktualisht në dy spitalet COVID janë të shtruar 28 pacientë dhe vetëm 3 prej tyre janë në terapi intensive. Prej më shumë se 10 ditësh nuk kemi asnjë humbje jete. Me pak se 15% e te prekurve aktivë po marrin trajtim në spitalet Covid, pjesa tjetër ndiqet nga mjeku i familjes”, vuri në dukje Tomini.

Prej gati 10 ditësh, Ministria e Shëndetësisë ka nisur edhe kryerjen e testimeve serologjike për mjekët dhe infermierët. Pas stafeve mjekësore, këto testime do të shtrihen në popullatë, për t’i dhënë përgjigje dilemës nëse virusi ka qarkulluar më herët apo jo. “Nga fillimi i epidemisë, deri tani, në vendin tonë janë kryer 11089 testime, nga të cilat, 10559 janë testime molekulare dhe 530 janë testime serologjike”, ka bërë me dije Ministria e Shëndetësisë. Prej së hënës ka nisur edhe lehtësimi i mëtejshëm i masave. Veç dyqaneve në qendrat tregtare kanë rifilluar aktivitetin edhe parukeritë, klinikat dentare dhe berberët. Nëse situata paraqitet në këto nivele, atëherë parashikohet që në 18 maj të hapen edhe baret dhe restorantet.