Ndalojnë testet e gjakut, për të tretën ditë 4 raste me COVID
Zgjerohet harta në Tiranë dhe Berat. Në spital, vetëm 21 pacientë, nje në terapi intensive
Për të tretën ditë radhazi janë konfirmuar vetëm 4 raste me koronavirus, nga 246 testime të kryera. Nga rastet e prekura me COVID19 është edhe një grua shtatzënë, ndërkohë që harta është zgjeruar në Tiranë dhe Berat.
Aktualisht, në kryeqytetet janë 70 persona pozitivë, ndërkohë që në Berat pas riaktivizimit të vatrës në fillim të kësaj jave, numri i rasteve të konfirmuara ka shkuar në 3. “Në 24 orët e fundit janë testuar 246 qytetarë të dyshuar si të prekur me Covid- 19. Vijon pozitiviteti i ulët nën 2%, në raport me testimet ditore. Në 24 orët e fundit kanë rezultuar pozitivë 4 qytetarë, përkatësisht 2 në Berat dhe 2 në Tiranë, mes të cilëve një grua shtatzënë. Ndërsa të shëruar janë 6 qytetarë. Deri më sot janë konfirmuar pozitivë me COVID- 19 në të gjithë vendin 880 qytetarë, 78 % e të cilëve janë shëruar”, ka bërë me dije Flutura Beqo, përfaqësuese e Task- Forcës së ngritur nga Ministria e Shëndetësisë. TRAJTIMI NË SPITAL
Pozitive paraqitet situata edhe në spitale. Numri i të shtruarve ka zbritur në 21 përgjatë 24 orëve të fundit, prej të cilëve 1 është në reanimacion. Në të gjithë vendin, aktualisht janë 161 persona aktivë me COVID- 19, kryesisht ne Tiranë, Krujë, Shkodër. Situata në spitale paraqitet e qëndrueshme prej ditësh. Aktualisht, në dy spitalet COVID janë të shtruar 21 pacientë dhe vetëm 1 prej tyre është në terapi intensive”, ka bërë me dije ministria. TESTET SEROLOGJIKE
Edhe pse ishte paralajmëruar që do të kishte një fazë të dytë për testimet serologjike, shtrirja e tyre në popullatë duket e largët. Prej fillimit të kësaj jave janë raportuar vetëm 530 teste serologjike në radhët e personelit mjekësor, shifër kjo e cila s’ka ndryshuar. “Nga fillimi i epidemisë deri tani, në vendin tonë janë kryer 11578 testime, nga të cilat, 11,048 janë testime molekulare dhe 530 janë testime serologjike”, ka raportuar dje Ministria e Shëndetësisë. Testet serologjike, të cilat kryhen përmes gjakut, shërbejnë për të kuptuar se cilët e kanë kaluar sëmundjen dhe cilët jo. Pra, ndihmon për të pasur një pasqyrë të situatës reale. Ministria paralajmëroi pak ditë më parë se pas stafeve mjekësore, këto testime do të nisnin edhe në popullatë. Por deri më tani nuk është bërë asnjë hap përpara, sa kohë që shifrat vijojnë të qëndrojnë në vendnumëro. Këtë javë nisi edhe lehtësimi i mëtejshëm i masave, ndërsa të hënën parashikohet që të hapen edhe baret e restorantet. “Pavarësisht situatës së përmirësuar, Ministria e Shëndetësisë dhe Mbrojtjes Sociale thekson se është shumë e rëndësishme që qytetarët të ruajnë distancimin fizik dhe higjienën personale; bizneset të zbatojnë protokollet e sigurisë për të ruajtur shëndetin e qytetarëve”, vihet në dukje në njoftimin e ministrisë.