Meta: Paralajmërimi i BERZH- it tregon krizën e thellë të ekonomisë
Pas parashikimit pesimist për një rënie me 9.0 për qind të PBB- së të Shqipërisë në vitin 2020 nga BERZH, ka ardhur edhe reagimi i Presidentit Meta, duke bërë apel për marrjen e masave të menjëhershme. Sipas kreut të shtetit, ky parashikim, por edhe të tjerë bërë herët, tregojnë se ekonomia shqiptare ka nevojë për reforma që të kurojnë krizën e thellë strukturore. "Paralajmërimet e fundit të BERZH- it dhe të institucioneve të tjera ndërkombëtare për uljen e rritjes ekonomike të Shqipërisë, janë jo vetëm shqetësuese në një plan afatshkurtër, por edhe tregojnë krizën e thellë strukturore të ekonomisë sonë. Ndaj, duhet të punohet seriozisht për të mbështetur aktivitetet ekonomike aktuale, por dhe të mendohet për të tejkaluar krizën strukturore, duke rishikuar modelin ekonomik", theksoi kreu i shtetit. Meta kërkon më shumë punë nga organet shtetërore për një diversifikim më të madh të ekonomisë, duke iu dhënë frymë edhe disa sektorëve të tjerë. "Modeli ekonomik duhet të mbështetet në diversifikimin e ekonomisë, për të ulur riskun e krizave dhe për të siguruar një zhvillim ekonomik të qëndrueshëm. Ne duhet të punojmë për të shfrytëzuar kapacitetet potenciale të vendit tonë për të rritur prodhimin e energjisë, për të rritur vlerën e burimeve minerale dhe natyrore nëpërmjet përpunimit të tyre, për të rritur prodhimin industrial dhe për të shumëfishuar prodhimin bujqësor dhe atë agro- industrial. Zgjerimi i kapaciteteve portuale, i rrjetit të transportit, si dhe i transmetimit të energjisë është potencialisht një mundësi tjetër për të shfrytëzuar avantazhin tonë gjeografik rajonal", shkroi Presidenti Meta.