‘ BiznesAlbania’: Sipërmarrjet, në vështirësi financiare
Koli Sinjari: Kompanitë po largojnë punonjësit nga puna
Kriza e shkaktuar nga Covid- 19 ka krijuar një dëm të konsiderueshëm ekonomik dhe po ndryshon mënyrën e funksionimit të biznesit shqiptar. Ky është përfundimi kryesor i një studimi që "BiznesAlbania" ka kryer me 278 kompani në të gjithë Shqipërinë, lidhur me gjendjen aktuale të ndërmarrjeve. Në të dhënat e studimit, vërehet se vetëm 24% e ndërmarrjeve funksionojnë plotësisht, ndërsa 31% kanë ndalur funksionimin. Drejtori i "BiznesAlbania", Koli Sinjari, thotë se një pjesë e vogël e ndërmarrjeve po operojnë pjesërisht, pasi klientët janë prekur nga situata dhe kërkesa është më e ulët në këtë kohë pandemie. Sipas tij, është cenuar ndjeshëm i gjithë zinxhiri ekonomik për pjesën më të madhe të bizneseve që operojnë në disa sektorë dhe që kanë marrëdhënie ndërvarësie me eksportet e importet. "Shqetësimet janë nga më të ndryshmet, por kryesisht ato janë përqendruar në atë që fluksi i parave, që janë në përmbajtjen e stafit, por gjithashtu edhe për të organizuar operacionet e tyre, janë të pamjaftueshme, ndaj janë edhe problem me bankat. Furnizuesit kanë qenë të parregullt, për shkak se ato kanë pasur problemet e tyre. Partnerët, me të cilët punojnë kompanitë, nuk kanë qenë në nivelin e duhur, për shkak se është prishur zinxhiri i bashkëpunimit, kështu që në qoftë se një partner nuk punon dhe një eksportues nga jashtë nuk funksionon, i gjithë zinxhiri ka qenë i vështirë", thekson Sinjari gjatë një interviste për "News 24". Kompanitë e pyetura shprehin shqetësim për të ardhmen e afërt, pasi 41 % e tyre thonë se po largojnë njerëzit nga puna, ndërsa pjesa tjetër, me gjithë vështirësitë që po hasin këtë kohë, është duke e mbajtur pjesërisht fuqinë punëtore. "Ky numër është 41 %, që, po, do të largojmë njerëzit nga puna, ndërsa 59% pjesërisht ose do gjejmë mënyra të tjera të ndryshimit të formës së biznesit në mënyrë që të përballojmë situatën në forma të tjera. Por pjesa më e madhe thonë, po, jemi përballë një situate që do largojmë njerëzit nga puna", shtoi më tej drejtori i "BiznesAlbania". Për shkak të situatës së krijuar, Sinjari thotë se bizneseve do t'u duhet të paktën 6 muaj të rikthehen në normalitet. "Jo të gjithë kompanitë kanë plane afatgjata të tyre. Dhe një pjesë e madhe të tyre, rreth 40%, thonë që brenda një periudhe e kemi shumë të vështirë të marrim veten. Vetëm pak thonë që mund ta marrim veten nga 30- 90%, pjesa tjetër thotë që do ta kemi të vështirë, që do të thotë se duan 6 muaj për të marrë veten, që nuk është e thjeshtë për të përballuar situatat ekonomike dhe financiare", deklaron Koli Sinjari. Ndërmarrjet e anketuara nga "BiznesAlbania" i përkasin një game të gjerë sektorësh; shumica e tyre janë biznese private dhe të themeluara ndërmjet viteve 1990- 2017, çka do të thotë se kanë një eksperiencë të konsiderueshme në treg. Drejtori i "BiznesAlbania" thotë se ndikimi në ekonominë e përgjithshme mund të jetë i rëndësishëm nëse nuk merren masa në kohë për vazhdimësinë e biznesit.