Legalizimet, emrat e rinj që marrin tapinë

Bashkëngjitur, edhe emrat e 640 pronarëve që kompensohen

KOMPENSOHEN 640 PRONARE/ Zbardhet vendimi i qeverisë për legalizimin e ndërtimeve pa leje. Gazeta boton emrat e përfituesve në Tiranë dhe 13 qytete. Bashkë me përfituesit e tapive ndahet edhe kompensimi i pronarëve. Cilat janë familjet që do marrin paratë. Qeveria krijon Agjencinë e Shpronësimeve, do paguajë tokat që merren për “interes publik”

Janë 360 familje që kanë gati tapinë. Vendimi për kalimin e së drejtës së pronësisë mbi parcelat e objekteve të legalizuara është botuar dje në Fletoren Zyrtare.

"Këshilli i Ministrave vendosi miratimin e kalimit të së drejtës së pronësisë në favor të subjekteve përfituese, për 344 parcela ndërtimore të objekteve të legalizuara dhe kompensimin financiar të pronarëve të pasurive të paluajtshme që preken prej tyre", thuhet në vendimin që mban datën 29 prill. Referuar tabelave zyrtare, përfituesit janë në Tiranë, Kamzë, Vorë, Kavajë, Gjirokastër, Durrës, Lezhë, Vlorë, Sarandë, Korçë, Shkodër, Fier, Elbasan, Berat, Kukës dhe Zonat e Stimuluara. Në ligjin e ri "Për përfundimin e proceseve kalimtare të pronësisë" përcaktohet që procedurat e regjistrimit nga ana e Agjencisë së Kadastrës të mbyllen në harkun e 60 ditëve. Pra, brenda 2 muajve këto familje do të kenë mundësi të marrin edhe tapinë. "ASHK- ja, brenda 60 ditëve, nga përfundimi i procedurave të kualifikimit, ligjëson ndërtimin, duke respektuar dispozitat e legjislacionit në fuqi për regjimet pasurore martesore, sipas gjendjes së momentit të aplikimit për ligjësim. Poseduesi i ndërtimit pa leje ka të drejtë të kërkojë përfundimin e procedurave administrative brenda 30 ditëve, nga paraqitja e kërkesës, kundrejt pagesës së një tarife shërbimi shtesë", thuhet në ligj.

Bashkangjitur kësaj liste janë edhe emrat e 640 pronarëve të shpronësuar për efekt të procesit legalizues, të cilët marrin paratë e kompensimit. "Masa e kompensimit është 32 804 m ² dhe vlera e përgjithshme e kompensimit financiar është 346 766 477,25 lekë". Ndarja e këtij fondi do të bëhet nga Agjencia e Trajtimit të Pronave.